اسلام آباد(نیشنل ٹائمز)پاکستان پیپلز پارٹی کی مرکزی رہنما سینیٹر پلوشہ خان نے کہا ہے کہ قوم منتظر ہے کہ بھٹو ریفرنس کی سپریم کورٹ میں کب سماعت ہوگی کیونکہ بھٹو ریفرنس دس سال سے سماعت کا منتظر ہے۔ صدر پاکستان نے دس سال قبل سپریم کور ٹ سے شہید ذوالفقارعلی بھٹو کی پھانسی پر رائے مانگی تھی۔ اپنے ایک بیان میں سینیٹر پلوشہ خان نے کہا کہ شہید ذوالفقار علی بھٹو کو پھانسی کی سزا سنانے والے ایک جج کا بیان ریکارڈ پر ہے۔ سپریم کورٹ کے سابق چیف جسٹس جو اس وقت بطور جج بنچ میں شامل تھے نے نجی ٹی وی پر اعتراف کیا کہ ذوالفقار علی بھٹو کو پھانسی کی سزا غلط تھی۔ قوم پوچھتی ہی رہے گی کہ بھٹوز سے انصاف میں کیا رکاوٹ ہے۔ پوری قوم شہید ذوالفقار علی بھٹو کے انصاف کی منتظر ہے۔ سینیٹر پلوشہ خان نے سپریم کورٹ سے درخواست کرتے ہوئے کہا کہ بھٹو ریفرنس کی جلد سماعت کی جائے۔ انہوں نے کہا کہ شہید محترمہ بینظیر بھٹو کے قاتلوں کو بھی سزا نہیں ہوئی۔ انہوں نے کہا کہ انصاف میں تاخیر انصاف سے انکار کے مترادف ہے۔ پلوشہ خان نے کہا کہ پاکستان پیپلزپارٹی کی قیادت آج بھی بے بنیاد اور جھوٹے ریفرنسوں میں اپنی بے گناہی ثابت کرنے کے لئے عدالتوں میں پیش ہوتی ہے۔