تحریر : تحمید صادق برطانیہ
اس وقت پوری دنیا بشمول پاکستان اور جہاں جہاں کرکٹ دیکھی جاتی ہے کی نظریں امارات میں جاری ٹی ٹونٹی ورلڈ کپ پر مرکوز ہیں۔ خوش قسمتی سے پاکستان کرکٹ ٹیم نے اپنے گروپ کے ابتدائی تین مگر اہم میچ بہت شاندار کارکردگی کا مظاہرہ کرتے ہوئے بآسانی جیت لئے اور سیمی فائنل میں تقریباََ اپنی جگہ پکی کر لی ہے۔ پہلے میچ میں انڈیا کو ناکوں چنے چبوا کر گئی سالوں سے چلا خوامخوا کا ’’جنکس ‘‘بالآخر توڑ ڈالا اور ہندوستان کو 10وکٹوں سے عبرتناک شکست دی۔

ابھی تک کے تینوں میچوں کا اگر جائزہ لیا جائے تو بہت عرصہ بعد پاکستان کرکٹ ٹیم ایک اکائی کی صورت دکھائی دی اور تمام کھلاڑی بہت جذبے کیساتھ کھیلتے دکھائی دیئے ۔ بالرز نے اپنا کام بدرجہ اتم اور احسن طور پر انجام دیا جبکہ بلے بازوں نے ماضی کے برعکس انتہائی ذمہ داری کیساتھ اپنی جیت کو پایائے تکمیل تک پہنچایا۔ پاکستانی ٹیم کی فیلڈنگ جو کہ ماضی میں انتہائی ناقص اور غیر معیاری رہی ہےلیکن اس ٹورنامنٹ میں ابھی تک بہت ہی شاندار رہی ۔

غرض کہ ہماری ٹیم ہر شعبہ میں حریف ٹیموں پہ حاوی رہی ۔ جب بھی کبھی پاکستان کی کرکٹ کو دیوار سے لگانے کی کوشش کی تو پھر شاہینوں نے اس کا دیوانہ وار شدت بھرپور پلٹ کے جواب دیا۔ انشا اللہ اس مرتبہ ورلڈ کہ اٹھا کہ ایک بار پھر ان قوتوں کا غرور زمین میں ملایا جائیگا۔پوری پاکستانی قوم اپنی ٹیم کیساتھ کھڑی ہےاور یہ اسی بات کا نتیجہ ہے کہ جس کھلاڑی کو بھی موقع ملا اس نے اپنا 100فیصد دیا۔ اب ہماری ٹیم گروپ کے بقیہ دو میچز اور پھر سیمی فائنل اورفائنل جیت کر اس قوم کو تحفہ دیں اور نا خدائوں کا غرور زمین بوس کر دیں۔