اسلام آباد(نیشنل ٹائمز) چیئرمین پاکستان پیپلز پارٹی بلاول بھٹو زرداری نے دنیا پور چوک پر استقبال کرنے والے پیپلزپارٹی کے کارکنوں اور عوام سے مختصر خطاب کرتے ہوئے کہا کہ ملک پر نالائق اور نااہل حکمران قابض ہیں جنہوں نے آپ کے حقوق پر ڈاکہ ڈالا ہے اور آپ کے جیبوں پر ڈاکہ مارا ہے۔ آپ کے ووٹ پر ڈاکہ مارا ہے، آپ کے پیٹ پر ڈاکہ مارا ہے۔ آپ کو یاد ہے کہ پیپلزپارٹی کے دور میں عوام کو روزگار ملتا تھا ترقی ملتی تھی۔ آج ملتان کے عوام کا کوئی وارث نہیں ہے۔ پیپلزپارٹی نے اقتدار میں آکر عوام کے مسائل حل کرے گی۔ انہوں نے کہا کہ اگلی حکومت پیپلزپارٹی کی ہوگی اور ملتان کے عوام کے مسائل حل کرے گی۔ اس سے قبل میلسی سے تعلق رکھنے والے عمران ممتاز بھابھا نے چیئرمین پیپلزپارٹی سے ملاقات کرکے پاکستان پیپلزپارٹی میں شمولیت اختیار کی۔ اس موقع پر سابق وزیراعظم سید یوسف رضا گیلانی، مخدوم احمد محمود، علی حیدر گیلانی اور قاسم گیلانی بھی موجود تھے۔ چیئرمین پیپلزپارٹی بلاول بھٹو سے ملتان سے تعلق رکھنے والے سینئر صحافیوں نے ملاقات کرکے ان کے میڈیا ڈیویلپمنٹ اتھارٹی بل پر ان کے موقف کو سراہا۔ صحافیوں سے گفتگو کرتے ہوئے چیئرمین پیپلزپارٹی نے صحافیوں کو یقین دلایا کہ آزادی صحافت کی جدوجہد میں پارٹی ان کے ہمقدم رہے گی۔