بیجنگ (شِنہوا) چینی وزارت خارجہ کی ترجمان ماؤ ننگ نے جمعہ کے روز کہا ہے کہ چین کو امید ہے کہ یورپی یونین (ای یو) دوطرفہ تجارت میں متوازن ترقی اور پائیدار پیش رفت کو مشترکہ طور پر فروغ دے گی اور عالمی صنعتی و سپلائی چینز کے مستحکم اور ہموار آپریشن کو برقرار رکھے گی۔
ماؤ ننگ نے یہ بات معمول کی پریس بریفنگ کے دوران چین اور یورپی یونین کے تجارتی تعلقات میں تازہ پیش رفت پر تبصرہ کرنے کے لئے پوچھے گئے ایک سوال کے جواب میں کہی۔
انہوں نے کہا کہ چین اور یورپی یونین کے درمیان تجارت اور سرمایہ کاری سے متعلق مشاورتی طریقہ کار کے دوسرے اجلاس میں حال ہی میں مثبت پیش رفت ہوئی ہے، جس سے ظاہر ہوتا ہے کہ دونوں فریق بات چیت کے ذریعے اختلافات کو مناسب انداز میں حل کر سکتے ہیں۔
انہوں نے کہا کہ چین کو امید ہے کہ یورپی یونین آزاد تجارت اور کھلے پن سے متعلق اپنے عزم کی پاسداری کرے گی، عالمی تجارتی تنظیم (ڈبلیو ٹی او) کے قواعد پر عمل کرے گی اور تحفظ پسندانہ و امتیازی پالیسیوں اور اقدامات متعارف کرانے سے گریز کرے گی۔