تہران(شِنہوا)ایران کی وزارت انٹیلی جنس نے کہا کہ اس کی فورسز نے 2 جنوبی صوبوں میں “شدت پسند دہشت گرد” گروہوں سے وابستہ3 منظم آپریشنل سیلز کو تباہ کر دیا ہے، جس کے نتیجے میں دو ارکان ہلاک اور 10 دیگر گرفتار کر لیے گئے۔
ایرانی ذرائع ابلاغ میں منگل کو جاری ایک بیان کے مطابق وزارت نے کہا کہ انسداد دہشت گردی کی کارروائیاں صوبہ سیستان و بلوچستان اور صوبہ ہرمزگان میں پاسداران انقلاب اور صوبائی پولیس کے اہلکاروں کے تعاون سے کی گئیں۔
بیان میں کہا گیا کہ ان سیلز کے ارکان “دہشت گردی اور تخریبی کارروائیوں” کے ارتکاب اور “بدامنی پھیلانے” کی کوشش کر رہے تھے۔ وزارت نے دعویٰ کیا کہ وہ امریکہ اور اسرائیل سے وابستہ تھے اور انہوں نے بیرون ملک فوجی تربیت حاصل کی تھی۔
بیان میں مزید کہا گیا کہ ایران میں داخل ہونے کے بعد ان ارکان کو ٹیم ہاؤسز میں ٹھہرایا گیا تھا اور ان کے قبضے سے اسلحہ اور گولہ بارود بھی برآمد کیا گیا۔