ساؤپاؤلو(شِنہوا) برازیل کے صدر لوئز اناسیو لولا ڈی سلوا کی انتخابی مہم نے ملک کی اعلیٰ انتخابی عدالت سے درخواست کی ہے کہ وہ اس بات کی تحقیقات کرے کہ آیا اتوار کو ہونے والے صدارتی انتخابات سے قبل امریکی قونصلر خدمات معطل کرنے کا فیصلہ سکیورٹی خدشات سے متعلق تھا یا یہ انتخابی عمل میں مداخلت کے مترادف تھا۔
مقامی میڈیا نے رپورٹ کیا کہ لولا کے اتحاد برازیل پرانٹو پرا مائس کی جانب سے سپیریئر الیکٹورل کورٹ میں دائر درخواست میں مئوقف اختیار کیا گیا کہ قونصلر خدمات کی معطلی سے ووٹنگ سے ایک روز قبل برازیل کو ایک غیر مستحکم ملک کے طور پر پیش کیا جا سکتا تھا اور اس سے لبرل پارٹی کے اپوزیشن صدارتی امیدوار فلیویو بولسونارو کو فائدہ پہنچ سکتا تھا۔
امریکی سفارتخانے نے جمعرات کو اعلان کیا تھا کہ برازیل میں سفارتخانے اور اس کے قونصل خانوں کی قونصلر خدمات جمعہ سے معطل کر دی جائیں گی۔
سفارتخانے نے اس کی وجہ “سکیورٹی خدشات” بیان کی تھیں، تاہم مزید وضاحت نہیں کی۔ امریکی شہریوں کو امریکی سفارتی مراکز کا رخ نہ کرنے کا مشورہ دیا گیا، جبکہ سفارتی عملے کو گھر سے کام کرنے کی ہدایت کی گئی۔
درخواست میں اس بات کی تحقیقات کا بھی مطالبہ کیا گیا کہ آیا اپوزیشن سے وابستہ شخصیات نے خدمات کی معطلی کے سلسلے میں امریکی حکام کے ساتھ کوئی رابطہ کیا تھا۔