تہران (شِنہوا) ایران کے ایک اعلیٰ سکیورٹی عہدیدار نے خبردار کیا ہے کہ متحدہ عرب امارات (یو اے ای) کی جانب سے اسرائیلی وزیراعظم بنیامین نیتن یاہو کی میزبانی کے اچھے نتائج نہیں ہوں گے۔
ایران کی اعلیٰ قومی سلامتی کونسل کے سیکرٹری محسن رضائی نے سوشل میڈیا پلیٹ فارم ایکس پر ایک پوسٹ میں کہا کہ جس طرح امریکی فوجی اڈوں کی میزبانی سے متحدہ عرب امارات کو سکیورٹی نہیں ملی، اسی طرح نیتن یاہو کی میزبانی کے بھی اچھے نتائج نہیں ہوں گے۔
نیتن یاہو کے دفتر نے پیر کے روز کہا تھا کہ وہ ایک روز قبل متحدہ عرب امارات کے صدر کی دعوت پر امارات کا دورہ کر چکے ہیں۔ دفتر کے مطابق ملاقات میں دوطرفہ تعلقات اور خطے کو درپیش مسائل پر بات چیت ہوئی۔
ایران کی وزارت خارجہ نے منگل کی شب جاری ایک بیان میں نیتن یاہو کے متحدہ عرب امارات کے دورے کی مذمت کرتے ہوئے خطے میں اسرائیل کی موجودگی کے “انتہائی خطرناک” نتائج سے خبردار کیا۔
وزارت خارجہ نے کہا کہ علاقائی حکومتوں سے توقع ہے کہ وہ اسرائیل کی ” تباہ کن موجودگی” کے لئے راہ ہموار کرنے سے گریز کریں گی اور اپنی سرزمین کو عدم استحکام پیدا کرنے والی کارروائیوں کے لئے اڈہ بننے کی اجازت نہیں دیں گی۔