تیانجن (شِنہوا) وزارت قدرتی وسائل کی جانب سے جاری ہونے والی ایک رپورٹ میں بتایا گیا ہے کہ چین میں 2025 کے دوران تیل اور گیس کے علاوہ معدنی ذخائر کے مجموعی طور پر 200 نئے ذخائر دریافت کئے گئے۔
“چائنہ منرل ریسورسز 2026” کے عنوان سے یہ رپورٹ چین کی شمالی تیانجن بلدیہ میں جاری 28 ویں چائنہ مائننگ کانفرنس و نمائش 2026 کے موقع پر جاری کی گئی۔
رپورٹ کے مطابق 2025 میں چین کی ارضیاتی تلاش میں سرمایہ کاری مسلسل پانچویں سال مثبت نمو ریکارڈ کرنے کے ساتھ معدنیات کی تلاش میں بھی اہم پیش رفت جاری رہی۔
نئے دریافت ہونے والے 200 معدنی ذخائر میں 16 سونے اور 11 لوہے کے ذخائر شامل ہیں، جو سب سے زیادہ دریافت ہونے والی معدنیات کی اقسام ہیں۔
رپورٹ میں بتایا گیا ہے کہ روایتی تیل و گیس کی تلاش کے حوالے سے تاریم اور جونگ گار طاس سمیت مختلف علاقوں میں نئی تہوں اور نئے زونز میں اہم پیش رفت ہوئی ہے۔
2025 میں چین کی کوئلے کی پیداوار 4.85 ارب ٹن رہی، جو گزشتہ سال کی نسبت 1.4 فیصد زیادہ ہے، جبکہ خام تیل کی پیداوار 21 کروڑ 60 لاکھ ٹن رہی، جس میں 1.5 فیصد اضافہ ہوا اور اس طرح مسلسل ساتویں سال مثبت نمو برقرار رہی۔ رپورٹ کے مطابق گزشتہ سال قدرتی گیس کی پیداوار 262.06 ارب مکعب میٹر رہی، جو 6.3 فیصد زیادہ ہے۔
“باہمی مفاد پر مبنی تعاون، ماحول دوست اور ذہین ترقی” کے موضوع کے تحت منعقد ہونے والی اس تقریب میں 650 سے زائد ملکی و غیر ملکی کاروباری اداروں نے شرکت کی ہے۔ جمعرات سے ہفتہ تک جاری رہنے والی اس تقریب میں فورمز، نمائشیں اور کان کنی کے حقوق کی خرید و فروخت سے متعلق سرگرمیاں شامل رہیں، جن میں کان کنی کے شعبے کی اعلیٰ معیار کی ترقی اور کانوں کی ماحولیاتی بحالی سمیت مختلف موضوعات پر توجہ مرکوز کی گئی۔
14ویں 5 سالہ منصوبے (2021-2025) کے دوران چین نے تیل و گیس کے شعبوں سمیت 398 نئے بڑے اور درمیانے درجے کے سٹریٹجک معدنی ذخائر کی نشاندہی کی جبکہ تانبے، سونے اور پوٹاش سمیت اہم معدنیات کے شعبے میں تاریخی پیش رفت ہوئی۔