بیجنگ (شِنہوا) چین میں 2026 کی پہلی ششماہی کے دوران غیر ملکی سرمایہ کاری والے 35 ہزار نئے کاروباری ادارے قائم ہوئے جو گزشتہ سال کی اسی مدت کے مقابلے میں 7 فیصد زیادہ ہیں۔
اسٹیٹ ایڈمنسٹریشن فار مارکیٹ ریگولیشن کے مطابق خطے کے لحاظ سے بڑے برآمدی صوبوں اور سرحدی علاقوں دونوں میں غیر ملکی سرمایہ کاری والی نئی کمپنیوں کے قیام میں اضافہ ریکارڈ کیا گیا۔
بڑے برآمدی صوبوں میں غیر ملکی سرمایہ کاری والی نئی کمپنیوں کی تعداد میں سالانہ بنیاد پر ہائی نان میں 38.6 فیصد، شان ڈونگ میں 15.2 فیصد، گوانگ ڈونگ میں 8.1 فیصد اور جیانگسو میں 6.8 فیصد اضافہ ہوا۔
18 دسمبر 2025 کو ہائی نان فری ٹریڈ پورٹ میں پورے جزیرے پر خصوصی کسٹمز آپریشنز کے آغاز کے بعد ہائی نان نے غیر ملکی سرمایہ کاروں کے لئے سازگار کاروباری ماحول کو فروغ دینے کے مقصد سے وسعت کی متعدد پالیسیاں متعارف کرائی ہیں۔
شعبہ جاتی اعتبار سے صارفین کی مارکیٹ غیر ملکی سرمایہ کاری کو راغب کرنے والا ایک نیا شعبہ بن کر سامنے آئی ہے۔ صحت اور سماجی خدمات کے شعبے میں غیر ملکی سرمایہ کاری والی نئی کمپنیوں کی تعداد میں سالانہ بنیاد پر 27.1 فیصد اضافہ ہوا جبکہ تھوک اور پرچون کے شعبے میں 11.9 فیصد اور رہائش و کیٹرنگ کے شعبے میں 11.7 فیصد اضافہ ریکارڈ کیا گیا۔
وزارت تجارت کے الگ سے جاری کردہ اعداد و شمار کے مطابق رواں سال کی پہلی ششماہی میں غیر ملکی سرمایہ کاری والی تقریباً 4 ہزار 800 کمپنیوں نے چین میں اپنی سرمایہ کاری میں مزید اضافہ کیا جبکہ ہائی ٹیک صنعتوں میں براہ راست غیر ملکی سرمایہ کاری میں سالانہ بنیاد پر 33.2 فیصد کا نمایاں اضافہ ہوا۔
جون میں چین کی وزارت تجارت نے دیگر سرکاری محکموں کے ساتھ مل کر غیر ملکی سرمایہ کاری کے استعمال کو مستحکم اور بہتر بنانے کے لئے ایک ایکشن پلان جاری کیا جس میں 15 اقدامات کی تفصیل دی گئی ہے۔
اس منصوبے میں خدمات کے شعبے میں مارکیٹ تک وسیع تر رسائی کو ترجیح دی گئی ہے۔ اس کے علاوہ ’’انویسٹ چائنہ‘‘ انیشی ایٹو کو فروغ دینے اور سرکاری خریداری میں مساوی شرکت اور کاروباری سرگرمیوں تک منصفانہ رسائی سے متعلق غیر ملکی سرمایہ کاری والی کمپنیوں کے خدشات کو مکمل طور پر دور کرنے کے لئے بھی اقدامات پر زور دیا گیا ہے۔