اسلام آباد(نیشنل ٹائمز)اسلام آباد اور راولپنڈی میں موسلادھار بارش سے نشیبی علاقے زیر آب آگئے، نالہ لئی میں پانی کی سطح مسلسل بلند ہونے لگی۔

ضلعی انتظامیہ کے مطابق کٹاریاں کے مقام پر پانی کی سطح 20 فٹ تک پہنچ گئی، گوالمنڈی پل کے مقام پر پانی کا بہاؤ 17 فٹ ریکارڈ کیا گیا ہے۔

نالہ لئی کے اطراف خطرے کے سائرن بجا دیئے گئے، نالہ لئی کے کناروں پر بسنے والے افراد کو فوری علاقہ خالی کرنے کی ہدایت کی گئی ہے، انتظامیہ کے مطابق ڈھوک کھبہ اور صادق آباد میں پانی گھروں میں داخل ہوگیا۔

اعدادو شمار کے مطابق گولڑہ میں سب سے زیادہ 144 ملی میٹر، بوکرہ میں 132، پیرودھائی میں 105 اور گوالمنڈی میں 77 ملی میٹر بارش ریکارڈ کی گئی ہے۔

محکمہ موسمیات کے مطابق گجرات، سیالکوٹ، جہلم، شکر گڑھ اور گردونواح میں موسلادھار بارش سے کئی علاقوں میں فیڈرز ٹرپ کر گئے جس سے بجلی کی سپلائی معطل ہوگئی۔

واضح رہے کہ محکمہ موسمیات کی جانب سے پنجاب بھر میں مون سون بارشوں کے چھٹے سپیل کا الرٹ جاری کیا گیا تھا۔

محکمہ موسمیات نے ملک کے مختلف شہروں میں 21 اگست تک بارشوں کی پیشگوئی کی ہے، مردان، صوابی کے نشیبی علاقوں میں اربن فلڈنگ کا خدشہ ہے۔

خیبرپختونخوا کے پہاڑی علاقوں گلگت بلتستان، مری، گلیات اور کشمیر میں لینڈسلائیڈنگ کا اندیشہ ہے۔