اسلام آباد(نیشنل ٹائمز)ملک کو صاف اور سرسبز بنانے کے وزیر اعظم کے عزم میں عملی شمولیت اختیار کرتے ہوئے دارلاحساس کے یتیم بچوں نے فیض آباد انٹرچینج سے ملحقہ میدانی علاقے میں منیجنگ ڈائریکٹر پاکستان بیت المال ملک ظہیر عباس کھوکھرکے ہمراہ پودے لگائے۔پودے لگانے کی اس مہم میں تقریباً200بچوں نے شرکت کرتے ہوئے 200سے زائدپودے لگائے۔ تقریب سے خطاب کرتے ہوئے ایم۔ڈی پاکستان بیت المال نے کہا کہ اس مہم میں ان بچوں کو شرکت کرنے کا مقصد ان میں پودے لگانے کی قومی ذمہ داری کا احساس پیدا کرنا ہے، اس عمر میں پودے لگانے سے ان کے دل میں ناصرف قدرت سے محبت پیدا ہوگی بلکہ یہ بچے پودے لگانے کو اپنی زندگی کا معمول بنالیں گے اور پاکستان کو ہرا بھرا خوشگوار ماحول والا ملک بنانے میں اہم کردار ادا کریں گے۔ انہوں نے کہا کہ وزیر اعظم پاکستان نے ملک کو جنگلات کی کمی، آلودگی، کاربن کے اخراج جیسے مسائل اور شدید موسموں کے بد اثرات اور بڑھتے ہوئے عالمی درجہ حرارت سے محفوظ بنانے کے چیلنج کو ایک مشن کے طور پر لیا ہے جسے پورا کرنے کے لیے پوری قوم کوحکومت کا ساتھ دینا چاہیے۔ مہم میں شریک بچوں کے حوالے سے بتاتے ہوئے ملک ظہیر عباس نے کہا کہ اس وقت پاکستان بیت المال کے ملک بھرمیں 51دارلاحساس قائم ہیں جہاں یتیم بچوں کی بہترین انداز میں کفالت اور تعلیم و تربیت کو یقینی بنایا جارہا ہے۔