اسلام آباد(نیشنل ٹائمز)صدر عارف علوی سے سبکدوش ہونے والے ترجمان وزارت خارجہ ‘آسٹریلیا میں پاکستان کے نامزد سفیر زاہد حفیظ چوہدری کی ملاقات ہوئی۔صدر پاکستان صدر عارف علوی نےکہا کہ پاکستان آسٹریلیا کے ساتھ دو طرفہ تعلقات کو انتہائی اہمیت دیتا ہے۔ پاکستان باہمی دلچسپی کے تمام شعبوں میں آسٹریلیا کے ساتھ تعاون مزید مستحکم کرنا چاہتا ہے۔ ان کا کہنا تھا کہ پاکستان کی سماجی و اقتصادی ترقی کیلئے تعلیم اور پیشہ ورانہ تربیت کے شعبوں میں دوطرفہ تعاون فروغ دینے کی ضرورت ہے۔پاکستان اور آسٹریلیا کے درمیان تجارتی اور اقتصادی تعاون بڑھانے کے وسیع امکانات بھی موجودہیں۔ پاکستان آسٹریلیا کے ساتھ مختلف شعبوں بالخصوص زراعت ، تجارت ، کان کنی اور انفارمیشن ٹیکنالوجی میں دوطرفہ تعاون بڑھانا چاہتا ہے۔ پاکستان نے کاروبار دوست پالیسیاں اپنائیں ۔ اپنی توجہ جغرافیائی سیاست سے جیو اکنامکس پر منتقل کی ۔ نامزد ہائی کمشنر آسٹریلیا میں پاکستانی شہریوں کی سہولت اور فلاح و بہبود کے لیے کام کریں اور ہر ممکن تعاون فراہم کریں۔آسٹریلیا میں پاکستانی طلباء کی قابل ذکر تعداد موجود ہے اور دونوں ممالک کے درمیان تعلیمی تعاون مزید بڑھانے کی ضرورت ہے۔ صدر مملکت نے زاہد حفیظ چوہدری کو آسٹریلیا میں پاکستان کے ہائی کمشنر کے طور پر تقرری پر مبارکباد دی اور ہدایت کی کہ نامزد سفیر پاکستان آسٹریلیا تعاون مزید مضبوط اور متنوع بنانے میں اپنا کردار ادا کریں۔