اسلام آباد(نیشنل ٹائمز)پیپلزپارٹی کا ن لیگ کے تحریک عدم اعتماد سے متعلق بیان پر ردعمل آگیا۔سید نئیرحسین بخاری نے کہا کہ مسلم لیگ ن کا حکومت کے خلاف تحریک عدم اعتماد سے متعلق بیان مضحکہ خیز ہے۔مسلم لیگ ن کا بیان اپنی ناکامی اور سمجھوتوں کا ملبہ پیپلزپارٹی پر ڈالنے کے مترادف ہے۔پیپلزپارٹی کا حکومت کے خلاف موقف بڑا واضح ہے ن لیگ اپنی پوزیشن واضح کرے۔نئیر حسین بخاری نے واضح کیا کہ مسلم لیگ ن پیپلزپارٹی پر ملبہ ڈالنے کی بجائے پی ڈی ایم میں پیپلزپارٹی ہی دی گئی تجاویز یاد کرے۔شروع دن سے کہا کہ جلد بازی کی بجائے استعفوں اور تحریک عدم اعتماد کو سنجیدگی سے دیکھا جائے۔مسلم لیگ ن کی اپنی نہ کوئی حکمت عملی تھی نہ ہی کوئی درست سمت۔ن لیگ پارلیمان میں اپوزیشن کی سب سے بڑی جماعت اور اپوزیشن لیڈر بھی ان کا ہے۔جو سب سے بڑی جماعت ہے اسی پر لازم ہوتا ہے حکمت عملی بنانا اور لیڈ کرنا،۔انہوں نے استفسار کیا کہ پیپلزپارٹی پر ملبہ ڈالنے کی بجائے خود ن لیگ بتائے کہ انہوں نے تحریک سے متعلق کیا نمبر گیم مکمل کرلی ہے؟تحریک عدم اعتماد کی بات کرنے والی ن لیگ نے تو خود حکومت کو بچانے کے لئے ایک سہولتکار کا کردار ادا کیا۔ان کا کہنا تھاکہ جس جماعت نے پی ڈی ایم بنا کر اپوزیشن کو متحد کرنے کی کوشش کی اسی کو نوٹس جاری کرکے اتحاد میں دراڑیں ڈالی گئیں۔انہوں نے مزید کہا کہ پیپلزپارٹی پارلیمان کی بالادستی اور جمہوریت پر یقین رکھتی ہے سمجھوتوں اور مفادات کو نہیں دیکھتی۔