راولپنڈی،بنوں،پشاور (نیشنل ٹائمز)سکیورٹی فورسز نے شمالی وزیرستان میں آپریشن کرتے ہوئے 11دہشتگردوں کو ہلاک کر دیا جبکہ ڈیرہ اسماعیل خان میں دہشتگردوں کے حملے میں امن کمیٹی کے چار ارکان شہید ہوگئے ۔پاک فوج کے شعبہ تعلقات عامہ (آئی ایس پی آر)کے مطابق انٹیلی جنس بنیادوں پر جاری آپریشنز کے سلسلے میں گزشتہ 48 گھنٹوں کے دوران شمالی وزیرستان کے علاقے دتہ خیل میں خوارج کے متعدد ٹھکانوں کو نشانہ بنایا گیا،شدید فائرنگ کے تبادلے کے بعد بھارتی سرپرستی میں سرگرم فتنہ الخوارج سے تعلق رکھنے والے 11 دہشتگرد ہلاک ہوگئے ۔آئی ایس پی آر کے مطابق ہلاک دہشتگردوں کے قبضے سے بھاری مقدار میں اسلحہ اور گولہ بارود بھی برآمد کیا گیا۔ ڈیرہ اسماعیل خان کی تحصیل کلاچی میں تھانہ ہتھالہ کی حدودمیں کوٹ اٹل شریف کے قریب دہشتگردوں نے امن کمیٹی کے ارکان پر گھات لگا کر حملہ کر دیا۔ فائرنگ سے امن کمیٹی کے شاہ زیب، دانش، سولی اور نامعلوم رکن شہید ہوگئے جبکہ دہشتگرد ایک رکن کو اغوا کرکے لے گئے ۔پولیس کے مطابق حملہ آور امن کمیٹی ارکان کا اسلحہ بھی لے گئے ۔ سکیورٹی فورسز نے علاقے کو گھیرے میں لے کر سرچ آپریشن شروع کر دیا ۔ بنوں کے علاقے میریان میں آپریشن کے دوران دہشت گردوں سے مقابلے میں شہید ہونیوالے دو پولیس اہلکار کانسٹیبل وحید اللہ خان اور نوراللہ خان کی نماز جنازہ پولیس لائن بنوں میں ادا کی گئی ،اعلیٰ سول و عسکری حکام، عمائدین علاقہ اور شہریوں نے شرکت کی۔