اسلام آباد (نیشنل ٹائمز) اقوام متحدہ کے سیکرٹری جنرل کے خصوصی ایلچی ژاں آرنو نے نائب وزیراعظم و وزیر خارجہ اسحاق ڈار سے ملاقات کی، جس میں خطے کی موجودہ صورتحال اور امن و استحکام سے متعلق امور پر تبادلہ خیال کیا گیا۔ ملاقات کے دوران یو این خصوصی ایلچی نے اقوام متحدہ کے سیکرٹری جنرل کی جانب سے خطے میں امن کے قیام کیلئے پاکستان کی سفارتی کوششوں اور مثبت کردار کو سراہتے ہوئے خراجِ تحسین پیش کیا۔ اس موقع پر اسحاق ڈار نے خصوصی ایلچی کو خطے کی تازہ صورتحال پر تفصیلی بریفنگ دی اور کہا کہ پاکستان خطے میں امن و استحکام کیلئے مسلسل سفارتی رابطے جاری رکھے ہوئے ہے۔ انہوں نے کہا کہ پاکستان تمام متعلقہ فریقین سے مسلسل رابطے میں ہے تاکہ کشیدگی میں کمی اور امن کے فروغ کیلئے مشترکہ کوششیں جاری رہ سکیں۔ نائب وزیراعظم نے اقوام متحدہ کے سیکرٹری جنرل کی مسلسل حمایت اور تعاون پر اظہارِ تشکر بھی کیا۔ ملاقات میں اقوام متحدہ کی جانب سے خطے میں امن کیلئے پاکستان کے مثبت اور تعمیری کردار کی حمایت جاری رکھنے کے عزم کا اعادہ کیا گیا۔