کراچی (نیشنل ٹائمز) اسٹیٹ بینک آف پاکستان نے ہائو سنگ فنانس میں آسان قرضوں کی فراہمی کیلئے بڑے اقدامات کا اعلان کیا ہے،نئے فیصلوں کے تحت ہائو سنگ قرضوں کی منظوری کے عمل کو تیز، شفاف اور زیادہ سہل بنانے پر زور دیا گیا۔ مرکزی بینک کی جانب سے جاری بیان کے مطابق بینکوں اور ہائوس بلڈنگ فنانس کمپنیوں کو ہدایت جاری کی گئی ہے کہ ہائو سنگ قرض کی درخواستوں کو زیادہ سے زیادہ 15 ورکنگ دنوں میں مکمل نمٹایا جائے تاکہ شہریوں کو طویل تاخیر کا سامنا نہ کرنا پڑے۔ نئی پالیسی کے مطابق قرض لینے والوں کے لئے ڈیٹ بوجھ کی حد 65 فیصد مقرر کر دی گئی ہے جبکہ قرض کی منظوری کے لیے درخواست گزار کی گھریلو آمدن کو بنیادی معیار بنایا جائے گا اس کا مقصد مالی دبائو کو کم کرنا اور قرض کی واپسی کو قابلِ عمل بنانا ہے۔اسٹیٹ بینک نے پراپرٹی کی ویلیوایشن کے حوالے سے بھی نئی شرائط نافذ کی ہیں کراچی میں 50 لاکھ روپے تک کی جائیداد کے لیے اندرونی ویلیوایشن کی اجازت ہوگی جبکہ 50 لاکھ روپے سے زائد قیمت والی پراپرٹی کے لئے منظور شدہ ویلیوایٹر کی رپورٹ لازمی قرار دی گئی ہے۔ اسٹیٹ بینک کے مطابق ان اقدامات کا مقصد ہائو سنگ فنانس کے نظام میں شفافیت لانا، قرضوں کے عمل کو تیز کرنا اور کم آمدنی والے طبقے کو سستے گھروں کی سہولت فراہم کرنا ہے۔