اسلاآباد (نیشنل ٹائمز) اسلامی نظریاتی کونسل نے معرکہ حق کو ایک سال مکمل ہونے پر افواج پاکستان کو خراج تحسین پیش کیاہے، وزیراعظم شہبازشریف اور فیلڈ مارشل سید عاصم منیر کی قیادت کو سراہا، عرصہ زوجیت میں مالی اثاثوں سے متعلق عدالتی فیصلے پر تحفظات کا اظہار کرتے ہوئے اسلام آباد ہائی کورٹ کو خطوط لکھنے کا فیصلہ بھی کر لیا گیا۔ چیئرمین اسلامی نظریاتی کونسل علامہ راغب نعیمی کی زیرصدارت آن لائن اجلاس کا اعلامیہ جاری کر دیا گیا۔ شرکا نے معرکہ حق کو ایک سال مکمل ہونے پر افواج پاکستان کو خراج تحسین پیش کیا۔ وزیراعظم شہباز شریف اور فیلڈ مارشل سید عاصم منیر کی قیادت کو بھی سراہا۔اسلامی نظریاتی کونسل نے پہلگام واقعہ کو فالس فلیگ قراردیتے ہوئے بھارتی الزامات سختی سے مسترد کر دیئے۔ اعلامیے میں ایران اور امریکا اسرائیل کشیدگی میں کمی کیلئے پاکستان کی سفارتی کوششوں کی تعریف بھی کی گئی۔ اسلامی نظریاتی کونسل نے حافظ طاہر اشرفی کے ساتھ لندن واقعے پر تشویش کا اظہار کرتے ہوئے مطالبہ کیا کہ شرپسند عناصرکے خلاف کارروائی کی جائے۔ کونسل نے ماں کا دودھ محفوظ کرنے کے ادارے کے قیام کا بل اطمینان بخش قرار دیا ۔ عرصہ زوجیت میں مالی اثاثوں سے متعلق عدالتی فیصلے پر تحفظات کا اظہار کیا گیا۔ اسلامی نظریاتی کونسل نے معاملے پر اسلام آباد ہائی کورٹ کو خطوط لکھنے کا فیصلہ کیا ہے۔ دوران اجلاس مقدس اوراق کی ری سائیکلنگ کے ایس او پیز کی منظوری بھی دی گئی۔