برسلز (نیشنل ٹائمز) برسلز میں نیٹو ہیڈکوارٹرز میں پاک–نیٹو ملٹری اسٹاف مذاکرات کا 12واں دور منعقد ہوا، جس میں دونوں جانب سے اعلیٰ عسکری حکام نے شرکت کی۔

پاکستانی وفد کی قیادت چیف آف جنرل اسٹاف (CGS) لیفٹیننٹ جنرل سید عامر رضا نے کی، جبکہ نیٹو کی جانب سے ڈائریکٹر انٹرنیشنل ملٹری اسٹاف، کوآپریٹو سیکیورٹی ڈویژن، میجر جنرل ایرائے اُنگودر نے وفد کی سربراہی کی۔

مذاکرات کے دوران دونوں فریقوں کے درمیان پاک–نیٹو فوجی تعلقات، علاقائی سلامتی کی صورتحال، اور باہمی تعاون کے فروغ پر تفصیلی تبادلہ خیال کیا گیا۔ اس موقع پر تربیت، تعلیم اور مشترکہ مشقوں کے شعبوں میں تعاون بڑھانے پر بھی زور دیا گیا، جبکہ ابھرتے ہوئے سیکیورٹی چیلنجز سے نمٹنے کے لیے انٹرآپریبلٹی کو فروغ دینے کی اہمیت اجاگر کی گئی۔

ملاقات میں پیشہ ورانہ عسکری تعاون کو مزید مستحکم بنانے اور باہمی اعتماد کو فروغ دینے کے عزم کا اعادہ کیا گیا۔

مذاکرات کے موقع پر پاکستانی وفد نے بیلجیئم کے شہر مونس میں واقع نیٹو کے اتحادی کمانڈ آپریشنز ہیڈکوارٹر (SHAPE) کا بھی دورہ کیا۔