بیجنگ (شِنہوا) بیجنگ 2026 سے 2030 کے دوران شہری سرگرمی کے 4 نئے مراکز قائم کرنے کا ارادہ رکھتا ہے۔ یہ بات بدھ کے روز جاری کئے گئے شہر کے 15 ویں پانچ سالہ منصوبے کے ترقیاتی پلان میں بتائی گئی ہے۔
منصوبے کے مطابق یہ قومی دارالحکومت کے طور پر بیجنگ کے تزویراتی کردار کو پورا کرنے اور شہر کی مقامی ترتیب کو بہتر بنانے کے لئے ایک اہم قدم ہے۔
بیجنگ میونسپل ترقیاتی اور اصلاحی کمیشن کے ایک عہدیدار کے مطابق یہ 4 علاقے شہر کے دو مرکزی راستوں یعنی مرکزی محور اور چھانگ آن ایونیو کے ساتھ ساتھ ان کی توسیعی لائنوں کے اطراف میں تعمیر کئے جائیں گے تاکہ شہر کی فعالیت کو دوبارہ ترتیب دیا جا سکے۔
شہر کے مشرقی حصے میں گرینڈ کینال کے کنارے ایک پرفضا علاقہ بنایا جائے گا، جہاں پانی کی بحالی، ثقافتی ورثے اور کاروباری سرگرمیوں کو فروغ دیا جائے گا جبکہ نہر کے کنارے واقع علاقے کی فعالیت اور معیار کو بہتر بنایا جائے گا۔ مغربی حصے میں “دو پارکس اور ایک دریا” پر مشتمل واٹر فرنٹ پر ایک جدید شہری تفریحی علاقہ قائم کیا جائے گا، جس میں بیجنگ گارڈن ایکسپو پارک، شوگانگ پارک اور یونگ ڈنگ دریا کے اطراف شامل ہوں گے۔
جنوبی حصے میں مرکزی محور کے جنوبی حصے کے ساتھ ایک “مستقبل کا محور” تعمیر کیا جائے گا، جہاں چین کا نیا قومی قدرتی تاریخی عجائب گھر اور دارالحکومت کی منصوبہ بندی کے نمائشی ہال قائم کئے جائیں گے۔ شمالی حصے میں اولمپک طرز کا ایک استقبالیہ علاقہ تیار کیا جائے گا، جہاں مختلف مقامات، سہولیات اور وسائل کو موثر انداز میں استعمال کیا جائے گا۔