شین زین (شِنہوا) چین کے جنوبی ٹیکنالوجی مرکز شین زین میں سرحد پار ای کامرس برآمدات کی کسٹمز کلیئرنس کے نظام میں نمایاں بہتری آئی ہے جہاں شہر کی پہلی سرحد پار ای کامرس نگرانی سائٹ کو “پہلے معائنہ، بعد میں لوڈنگ” ماڈل کے تحت فعال کر دیا گیا ہے۔
اس ماڈل کے تحت سامان کی پہلی کھیپ کامیابی سے کسٹمز سے کلیئر ہو کر بیرون ملک روانہ کر دی گئی۔
شین زین کے محکمہ تجارت کے مطابق نئے ماڈل نے پہلے ہی دن سرحد پار ای کامرس برآمدات کے لئے کسٹمز کلیئرنس کے وقت 50 فیصد سے زیادہ اور مجموعی کاروباری اخراجات میں 30 فیصد سے زائد کمی کی ہے۔
شین زین میں سرحد پار ای کامرس کا حجم بہت بڑا ہے، جہاں بڑی تعداد میں آپریٹرز اور مضبوط برآمدی طلب موجود ہے۔ نئے ماڈل کے تحت انفرادی اشیاء پہلے نگرانی سائٹ میں داخل ہوتی ہیں، تمام کسٹمز معائنہ اور کلیئرنس کے مراحل سے گزرتی ہیں اور پھر کنٹینرز میں پیک کی جاتی ہیں۔ یہ طریقہ روایتی نظام کی جگہ لیتا ہے جس میں کسی ایک مشکوک کھیپ کی وجہ سے پورا کنٹینر رک سکتا تھا۔
نئی سائٹ میں 3 جدید ٹیکنالوجیز ڈیجیٹل ٹوئن، سمارٹ گیٹ اور کوڈ پر مبنی ٹریس ایبلٹی کو یکجا کیا گیا ہے جس کے ذریعے ہر کھیپ کو ایک منفرد اور محفوظ “ڈیجیٹل شناخت” دی جاتی ہے جس سے مکمل بصری نگرانی ممکن ہوتی ہے۔ اس کے علاوہ سمارٹ شیلوز، مکمل خودکار چھانٹی لائنیں اور معائنہ کرنے والے روبوٹس جیسے آلات سے لیس یہ نظام سمارٹ نگرانی اور موثر کسٹمز کلیئرنس کو یقینی بناتا ہے۔
محکمہ تجارت کے اعداد و شمار کے مطابق شین زین مسلسل 4 سال سے ملک کے بڑے شہروں میں سرحد پار ای کامرس کے حجم کے لحاظ سے پہلے نمبر پر ہے۔ دنیا کے 20 بڑے ای کامرس پلیٹ فارمز میں سے 16 یہاں موجود ہیں، جبکہ چین کی رجسٹرڈ سرحد پار ای کامرس کمپنیوں کا ایک تہائی بھی اسی شہر میں قائم ہے۔