بیجنگ(شِنہوا) 2025 کے دوران بیجنگ میں ہوا کا معیار اپنی نگرانی کے آغاز سے اب تک کی بہترین سطح پر پہنچ گیا، جہاں سالانہ اوسط پی ایم 2.5 کی مقدار ریکارڈ حد تک کم اور صاف ہوا والے دنوں کی تعداد ریکارڈ حد تک زیادہ رہی۔
جمعرات کو جاری ہونے والے 2025 کے ماحولیاتی اعلامیے کے مطابق بیجنگ میں پی ایم 2.5 کی سالانہ اوسط سطح کم ہو کر 27 مائیکروگرام فی مکعب میٹر رہ گئی جو گزشتہ سال کی نسبت 11.5 فیصد کمی کو ظاہر کرتی ہے۔
شہر میں سال کے 311 دن ہوا کا معیار اچھا رہا جو پورے سال کا 85.2 فیصد بنتا ہے۔ شدید آلودگی کا صرف ایک دن ریکارڈ کیا گیا، جو اب تک کی کم ترین تعداد ہے اور یہ اس بات کی علامت ہے کہ شدید آلودگی والے دن تقریباً ختم ہو چکے ہیں۔ یہ پیش رفت 2013 کے مقابلے میں ایک ڈرامائی تبدیلی ہے جب بیجنگ میں شدید آلودگی کے 58 دن اور اچھے معیار کی ہوا کے صرف 176 دن ریکارڈ کئے گئے تھے۔
اس کے بعد سے بیجنگ نے اپنی ماحول دوست تبدیلی کی رفتار تیز کی ہے جس میں کوئلے کے استعمال میں کمی، نئی توانائی سے چلنے والی گاڑیوں کا فروغ، ماحول دوست بجلی کے استعمال میں اضافہ، گرد و غبار اور شور کی آلودگی میں کمی اور آلودگی پھیلانے والی صنعتوں کی تبدیلی جیسے اقدامات شامل ہیں۔
آج ماحولیاتی بہتری صرف ہوا کے معیار تک محدود نہیں ہے۔ رپورٹ یہ بھی ظاہر کرتی ہے کہ پانی کے معیار میں بہتری کا سلسلہ جاری رہا، جہاں کلاس اول سے سوم تک درجہ بندی والے دریاؤں کا تناسب 95 فیصد سے تجاوز کر گیا۔
چین میں سطح زمین کے پانی کے معیار کو 5 درجات میں تقسیم کیا گیا ہے جس میں درجہ اول اعلیٰ ترین معیار ہے۔ مٹی کا معیار بھی بہتر رہا اور شہر کا مجموعی ماحولیاتی نظام مستقل طور پر بہتر ہوتا رہا۔
بیجنگ میونسپل بیورو برائے حیاتیات و ماحولیات کے نائب ڈائریکٹر لیو باؤ شیان نے کہا کہ بیجنگ آئندہ بھی آلودگی کی روک تھام، ماحولیاتی نظام کے تحفظ اور اہم شعبوں میں کم کاربن تبدیلی کو تیز کرنے کے اقدامات جاری رکھے گا۔