وہاڑی (محمد یوسف بھٹی) مسلم لیگ (ن) کی مرکزی رہنما اور رکن قومی اسمبلی تہمینہ دولتانہ نے پریس کانفرنس کرتے ہوئے کہا ہے کہ وزیر اعلیٰ پنجاب مریم نواز شریف کی قیادت میں صوبہ بھر میں ترقیاتی اور فلاحی منصوبوں پر تیزی سے کام جاری ہے اسی طرح وہاڑی میں بھی متعدد بڑے منصوبے مکمل کیے جا رہے ہیں۔ انہوں نے کہا کہ ملتان روڈ کی تعمیر کا منصوبہ تیزی سے پایہ تکمیل کو پہنچ رہا ہے جو جون میں مکمل ہو جائے گا اور اس کا افتتاح وزیر اعلیٰ مریم نواز شریف کریں گی۔ تہمینہ دولتانہ نے کہا کہ وہاڑی میں میڈیکل کالج کا قیام ان کی ترجیحات میں شامل ہے اور اس حوالے سے جلد مثبت پیش رفت سامنے آئے گی۔ انہوں نے بتایا کہ خانیوال چوک پر ڈبل پھاٹک کی تعمیر شہر کا دیرینہ مسئلہ تھا جس کے حل کے لیے مزید ساڑھے سات کروڑ روپے کے فنڈز جاری کر دیے گئے ہیں جبکہ سیوریج کے مسائل کے مستقل حل کے لیے ساڑھے چھ ارب روپے کی لاگت سے ٹریٹمنٹ پلانٹ کے فنڈز بھی منظور ہو چکے ہیں۔ انہوں نے کہا کہ شہر میں ٹریفک کے دباؤ کے باعث بعض اوقات سڑکیں بند رہتی ہیں تاہم شہری مسائل کے حل کے لیے ضلعی انتظامیہ کے ساتھ مل کر کام کیا جا رہا ہے اور اس سلسلے میں ڈپٹی کمشنر سے بھی تفصیلی بات چیت کی گئی ہے۔ تہمینہ دولتانہ نے کہا کہ شہر کو خوبصورت بنانے کے لیے بازاروں کی بہتری، کھیلوں کے گراؤنڈز کی بحالی اور نوجوانوں کے لیے جدید سپورٹس ایرینا کی تعمیر پر کام جاری ہے جبکہ ریڑھی بانوں کے مسائل ترجیحی بنیادوں پر حل کیے جائیں گے تاکہ انہیں روزگار کے بہتر مواقع میسر آ سکیں۔ انہوں نے کہا کہ مسلم لیگ (ن) کی قیادت کی کاوشوں سے پنجاب تیزی سے ترقی کی راہ پر گامزن ہے اور عوام کو بنیادی سہولیات کی فراہمی یقینی بنائی جا رہی ہے۔ اس موقع پر مسلم لیگی رہنما میاں آصف خورشید ،صدر مرکزی انجمن تاجران ارشاد حسین بھٹی، لائرز فورم کے ضلعی صدر رانا عمران ریاست و دیگر مسلم لیگی بھی موجود تھے۔