ماسکو (شِنہوا) روسی وزیر خارجہ سرگئی لاوروف نے کہا ہے کہ روس اور امریکہ کے رہنماؤں کے درمیان طے شدہ مفاہمت کی بنیاد پر روس یوکرین کے بحران کا مذاکرات کے ذریعے حل تلاش کرنے کو تیار ہے۔
انہوں نے کہا کہ روس گزشتہ سال اگست میں امریکی ریاست الاسکا کے شہر اینکرج میں روسی صدر ولادیمیر پوتن اور امریکی صدر ڈونلڈ ٹرمپ کے درمیان ملاقات کے نتائج پر مکمل کاربند رہنے کے لئے پرعزم ہے۔ انہوں نے اس بات پر زور دیا کہ ماسکو کو توقع ہے کہ مذاکرات کے دوران اس کے مفادات کو پوری طرح مدنظر رکھا جائے گا تاکہ شراکت داروں کے ساتھ مخلصانہ اور براہ راست بات چیت کے ذریعے باہمی تسلیم شدہ معاہدے طے ہو سکیں۔
لاوروف نے کہا کہ روس بین الاقوامی معاملات میں سچائی اور انصاف کو قائم رکھے گا اور اقوام متحدہ کے منشور کے مقاصد اور اصولوں پر مبنی کثیر قطبی دنیا کو فروغ دے گا اور ساتھ ہی ماسکو دوہرا معیار، خفیہ ایجنڈے، مسلط کئے گئے معاہدے، نوآبادیاتی اور بالادستی کے رویوں کی مخالفت کرے گا۔
وزیر خارجہ نے یہ بھی کہا کہ روس نئی ابھرتی ہوئی کثیر قطبی دنیا کے مراکز کے ساتھ تزویراتی شراکت داری مضبوط کرنے کو ترجیح دے گا اور اس کے ساتھ ہی روس اور ہم خیال شراکت دار تجارت، سرمایہ کاری، مالیات اور لاجسٹک تعاون کے لئے ایسے نظام بنانے پر کام کریں گے جو پابندیوں سے متاثر نہ ہوں۔