اسلام آباد(نیشنل ٹائمز) وفاقی حکومت نے بجلی کے بنیادی ٹیرف میں کمی اور فکسڈ چارجز کے نظام میں ردوبدل کا فیصلہ کر لیا ہے ۔ حکومت کی جانب سے ماہانہ 300، 400، 500 اور 700 یونٹ سے زائد بجلی استعمال کرنے والے گھریلو صارفین کے لیے بجلی سستی کرنے کی تجاویز تیار کی گئی ہیں۔تجویز کے مطابق اب ماہانہ 300 یونٹ تک بجلی استعمال کرنے والے گھریلو صارفین پر بھی فکسڈ چارجز عائد کرنے کی تجویز دی گئی ہے ۔ یہ فکسڈ چارجز پروٹیکٹڈ اور نان پروٹیکٹڈ دونوں صارفین پر لاگو ہوں گے ، جبکہ اس سے قبل صرف 300 یونٹ سے زائد بجلی استعمال کرنے والے نان پروٹیکٹڈ صارفین پر فکسڈ چارجز وصول کیے جاتے تھے ۔ماہانہ 100 یونٹ تک بجلی استعمال کرنے والے پروٹیکٹڈ صارفین پر 200 روپے اور ماہانہ 200 یونٹ استعمال کرنے والے پروٹیکٹڈ گھریلو صارفین پر 300 روپے فکسڈ چارجز تجویز کیے گئے ہیں۔ اسی طرح 100 یونٹ تک بجلی استعمال کرنے والے نان پروٹیکٹڈ صارفین پر 275 روپے جبکہ ماہانہ 200 یونٹ تک استعمال کرنے والوں پر 300 روپے فکسڈ چارجز لگانے کی تجویز ہے ۔ماہانہ 300 یونٹ تک بجلی استعمال کرنے والے نان پروٹیکٹڈ صارفین کے لیے 350 روپے فکسڈ چارجز تجویز کیے گئے ہیں۔ ماہانہ 400 یونٹ تک استعمال پر فکسڈ چارجز 200 سے بڑھا کر 400 روپے ، 500 یونٹ پر 400 سے بڑھا کر 500 روپے اور 600 یونٹ استعمال پر 600 سے بڑھا کر 675 روپے کرنے کی تجویز دی گئی ہے ۔ماہانہ 700 یونٹ تک بجلی استعمال کرنے والوں کے فکسڈ چارجز 800 سے کم کر کے 675 روپے جبکہ 700 یونٹ سے زائد استعمال پر فکسڈ چارجز میں 325 روپے کمی کی تجویز دی گئی ہے ۔ اس کے علاوہ ماہانہ 400 یونٹ استعمال پر فی یونٹ ٹیرف میں ایک روپے 53 پیسے اور 500 یونٹ تک استعمال پر ایک روپے 25 پیسے کمی کی تجویز بھی شامل ہے ۔پاور ڈویژن کی جانب سے وفاقی کابینہ کی منظوری کے بعد درخواست نیپرا میں جمع کروادی گئی ہے ، نیپرا پاور ڈویژن کی درخواست پر 10 فروری کو سماعت کرے گی۔