لاس ویگاس(شِنہوا) امریکہ کے شہر لاس ویگاس میں کنزیومر الیکٹرانکس شو (سی ای ایس) 2026 شروع ہو گیا جس کے منتظمین نے توقع ظاہر کی ہے کہ چینی کمپنیاں مکمل تفریح، روبوٹکس اور جدید نقل وحمل سمیت کلیدی شعبوں میں اپنی اختراعی ٹیکنالوجیز کا مظاہرہ کریں گی۔یو ایس کنزیومر ٹیکنالوجی ایسوسی ایشن (سی ٹی اے) کے ایگزیکٹو چیئر اور سی ای او گیری شاپیرو نے شِنہوا کو ایک تحریری انٹرویو میں بتایا کہ جب ہم سی ای ایس 2026 کی طرف دیکھتے ہیں تو اس میں توانائی اور اختراع کا مظاہرہ غیرمعمولی ہوگا۔اس سال کے شو میں مصنوعی ذہانت (اے آئی)، روبوٹکس، ڈیجیٹل صحت، نقل وحمل اور توانائی جیسے شعبوں میں تبدیلی لانے والے رجحانات اجاگر کئے جائیں گے۔انہوں نے کہا کہ ہم مصنوعی ذہانت پر مبنی حل، اگلی نسل کی گاڑیوں اور مکمل تفریح کے تجربات میں غیرمعمولی ترقی دیکھ رہے ہیں۔ یہ ٹیکنالوجیز ہمارے رہن سہن اور کام کرنے کے طریقوں کو از سرنو متعین کر رہی ہیں۔انہوں نے کہا کہ ٹیکنالوجی کے لحاظ سے دنیاکے اس سب سے نمایاں پروگرام، جو جمعہ تک جاری رہے گا، میں 155 ممالک اور خطوں کے افراد شرکت کر رہے ہیں، جس سے سرحد پار شراکت کے مواقع پیدا ہوں گے اور عالمی جدت کو تیز کرنے میں مدد ملے گی۔چینی کمپنیوں کی بڑھتی ہوئی موجودگی کو اجاگر کرتے ہوئے انہوں نے کہا کہ گیلی، ہائی سینس، لینووو، ٹی سی ایل اور یونی ٹری جیسی کمپنیاں ہمہ گیر تفریح، روبوٹکس، نقل و حرکت اور دیگر شعبوں میں جدت پیش کر رہی ہیں۔