ماسکو(نیشنل ٹائمز)روس نے نیو نازی نظریات کی حمایت کرنے والے کینیڈا کے 28 شہریوں کے ملک میں داخلے پر غیر معینہ مدت کے لیے پابندی عائد کر دی ہے۔
روسی وزارتِ خارجہ کے مطابق یہ اقدام کینیڈا کی جانب سے روسی شہریوں پر عائد کی گئی غیر قانونی اور روس مخالف سفری پابندیوں کے جواب میں اٹھایا گیا ہے۔بیان میں کہا گیا کہ جن 28 کینیڈین شہریوں پر پابندی لگائی گئی ہے، وہ پرو بانڈیرا تنظیموں سے وابستہ ہیں اور ایسے اقدامات میں ملوث رہے ہیں جن کا مقصد اس مجرمانہ نیو نازی نظریے کو فروغ دینا ہے جسے اس وقت کیف حکومت کی پشت پناہی حاصل ہے۔روسی وزارتِ خارجہ کا کہنا ہے کہ یہ افراد دوسری عالمی جنگ سے متعلق تاریخی حقائق کو نظر انداز کرتے ہوئے کینیڈا اور یوکرین کے انتہاپسند قوم پرست حلقوں کے درمیان تعلقات مضبوط بنانے کی کوشش کرتے رہے، جنہیں روس انتہائی شدت پسند اور ناقابلِ مفاہمت عناصر قرار دیتا ہے۔بیان میں مزید کہا گیا کہ یوکرین کے صدر ولادیمیر زیلینسکی کی جانب سے سابق کینیڈین وزیرِ خزانہ اور نائب وزیرِاعظم کرسٹیا فری لینڈ کو اقتصادی مشیر مقرر کرنا بھی اسی رجحان کی واضح مثال ہے، کرسٹیا فری لینڈ دوسری عالمی جنگ کے دوران نازی جرمنی کے معاون میخائل خوماک کی پوتی ہیں۔واضح رہے کہ کرسٹیا فری لینڈ اس سے قبل یوکرین کے لیے کینیڈا کی خصوصی نمائندہ بھی رہ چکی ہیں، اور اب انہیں باضابطہ طور پر یوکرینی صدر کا اقتصادی مشیر مقرر کر دیا گیا ہے۔