واشنگٹن(نیشنل ٹائمز) وائٹ ہاؤس کی پریس سیکرٹری کیرولین لیویٹ صحافی کے سادہ سے سوال کا انتہائی بدتمیزی سے غیر معمولی جواب دے کر سوشل میڈیا پر توجہ کا مرکز بن گئی ہے۔
برطانوی نشریاتی ادارے کے مطابق جب ایک رپورٹر نے وائٹ ہاؤس کی ترجمان سے سوال پوچھا کہ ٹرمپ اور پیوٹن کی ملاقات کے لیے ہنگری کے شہر بداپیسٹ کا انتخاب کس نے کیا؟ تو وائٹ ہاؤس کی پریس سیکرٹری کیرولین لیویٹ نے جواب دیا، ’’تمہاری ماں نے۔‘‘رپورٹ کے مطابق جب وائٹ ہاؤس کی ترجمان سے پوچھا گیا کہ کیا آپ نے یہ جواب مزاح کے طور پر دیا ہے، تو کیرولین لیویٹ کا کہنا تھا کہ آپ بائیں بازو سے تعلق رکھنے والے ایک انسان ہیں جو خود کو صحافی کہتے ہیں۔وائٹ ہاؤس کی ترجمان کا مزید کہنا تھا کہ میرے لیے یہ بات مزاح ہی ہے کیونکہ کوئی آپ کو سنجیدہ نہیں لیتا، یہاں تک آپ کے ساتھی بھی آپ کو سنجیدہ نہیں لیتے، مجھ سے فضول سوال کرنا بند کریں۔واضح رہے کہ چند روز قبل امریکی صدر ڈونلڈ ٹرمپ کی روسی ہم منصب ولادمیر پیوٹن سے ٹیلی فون پر طویل گھنٹہ گفتگو ہوئی تھی جس میں دونوں نے ہنگری کے شہر بداپیسٹ میں ملاقات پر رضامندی ظاہر کی تھی۔