العلمین،مصر(نیشنل ٹائمز)چین اور مصر نے غزہ پٹی میں مقامی لوگوں کی ضرور یات فوری طور پر پورا کرنے کیلئے فلسطینی عوام کو مشترکہ طور پر نوول کروناوائرس ویکسین کی 5لاکھ خوراکیں عطیہ کرنے کا فیصلہ کیاہے۔یہ اعلان چین کے ریاستی کونسلر و وزیرخارجہ وانگ یی کی اپنے مصری ہم منصب سامح شکری کے ساتھ مصر کے شمال میں ساحلی شہر العلمین کے سرکاری دورہ کے دوران ملا قات کے دوران کیا گیا۔فلسطین-اسرائیل حالیہ تنازعہ کے تناظر میں دونوں ممالک نے اس صورتحال پر گہری توجہ دی اور اس بات پر زور دیا کہ فلسطینی مسئلے کے منصفانہ حل کے فروغ کیلئے مسلسل کوششیں کرتے ہوئے عالمی برادری کو فلسطینی شہریوں کی انسانی صورتحال کابھی خیال کرنا چاہئے،خاص طور پر نوول کروناوائرس کیخلاف جنگ میں مقامی لوگوں کی مددکیلئے ٹھوس اقدامات اٹھانے چاہئیں۔عطیہ کی جانے والی ویکسینز مصر میں دونوں ممالک کی جانب سے مشترکہ طور پر لگائے گئے پیداواری پلانٹس کے ذریعے تیار کی جائیں گی اور فلسطین کے تعاون سے جلد از جلد بھیج دی جائیں گی۔