بیجنگ(شِنہوا)چینی وزارت خارجہ کے ایک ترجمان نے کہا ہے کہ چین کمبوڈیا اور تھائی لینڈ کے درمیان جنگ بندی کے نفاذ کے اقدامات، نگرانی کے نظام اور دیگر معاملات پر سمجھوتے کا خیرمقدم کرتاہے۔
ترجمان نے ملائیشیا میں کمبوڈیا۔تھائی لینڈ جنرل بارڈر کمیٹی (جی بی سی) کے غیر معمولی اجلاس کے حوالے سے پوچھے گئے سوال کے جواب میں کہا کہ کوالالمپور میں 28 جولائی کو کمبوڈین اور تھائی رہنماؤں کے درمیان طے پانے والے سمجھوتے کے مطابق کمبوڈیا اور تھائی لینڈ نے جی بی سی کا ایک غیر معمولی اجلاس منعقد کیا۔ جنگ بندی کے نفاذ کے اقدامات، نگرانی کے طریقہ کار اور دیگر معاملات پر سمجھوتہ کیا،جس نے ایک موثر جنگ بندی اور دونوں ممالک کے درمیان دیرپا امن کے قیام کی بنیاد رکھی۔ چین اس کا خیرمقدم کرتا ہے۔
ترجمان نے کہا کہ کمبوڈیا اور تھائی لینڈ کی سرحد پر کشیدگی کی صورتحال میں مسلسل کمی آرہی ہے،جس سے ثابت ہوتا ہے کہ تنازعات کے حل کے لئے بات چیت اور مشاورت ہی درست راستہ ہے۔
ترجمان نے کہا کہ چین نے ایک منصفانہ اور غیر جانبدار موقف برقرار رکھا ہوا ہے،ہم کمبوڈیا اور تھائی لینڈ کے درمیان رابطے بڑھانے اور اختلافات کو بہتر طریقے سے حل کرنے کی حمایت کرتے ہیں، ہم آسیان کے طریقہ کار کے ذریعے سیاسی تصفیے کی بھی حمایت کرتے ہیں اور کمبوڈیا اور تھائی لینڈ کے درمیان سرحدی تنازعات کے پر امن حل کے لئے تعمیری کردار ادا کرنا جاری رکھنے کے لئے تیار ہیں۔