انٹرنیشنل ڈیسک ( نیشنل ٹائمز)لبنانی کابینہ کی جانب سے ملک میں مزاحمتی گروہوں کو غیر مسلح کرنے کی قرارداد پر حزب اللہ نے سخت ردعمل ظاہر کیا ہے۔
حزب اللہ کی جانب سے جاری بیان میں لبنانی وزیراعظم نواف سلام کی کابینہ کی قرارداد کو گھناؤنا گناہ قرار دیا اور کہا کہ اس فیصلے کی حیثیت نہ ہونے کے برابر ہے، ساتھ ہی حکومت اور بااختیار اداروں کے ساتھ مذاکرات کرنے کا بھی عندیہ دے دیا۔ اس سے قبل لبنانی کابینہ نے فوج کو رواں سال کے آخر تک ہتھیاروں کو ریاستی کنٹرول میں لانے کا ٹاسک دیا جس کے بعد حزب اللہ اور امل ملیشیا سمیت ملک میں موجود مسلح مزاحمتی گروپوں کی جانب سے شدید رد عمل آیا ہے۔ گزشتہ روز حزب اللہ کے سیکرٹری جنرل نعیم قاسم نے حکومتی قرارداد کی سخت مخالفت کرتے ہوئے کہا کہ مزاحمتی تحریکیں طائف معاہدے کے تحت آئین کا حصہ ہیں اور اس معاہدے میں لبنان کے دفاع کے تمام ممکنہ طریقوں کا ذکر موجود ہے۔ دوسری جانب لبنانی وزیر انصاف ابراہیم نجار نے کہا کہ نعیم قاسم کا بیان سیاسی رائے ہے جس کا کوئی قانونی یا آئینی وزن نہیں کیونکہ آئین واضح طور پر ریاستی خودمختاری اور اسلحے کی اجارہ داری سمیت جنگ اور امن میں فیصلوں کا حق صرف ریاست کو سونپتا ہے۔