واشنگٹن( نیشنل ٹائمز) امریکا کے صدر ڈونلڈ ٹرمپ نے غزہ پر قبضے کا معاملہ اسرائیل پر چھوڑ دیا۔
امریکی صدر ٹرمپ نے صحافی کی جانب سے پورے غزہ پر اسرائیلی قبضے کے منصوبے سے متعلق سوال پر کہا کہ ان کی حکومت کی توجہ فلسطینیوں کے محصور علاقوں میں زیادہ غذا پہنچانے پر ہے ۔ٹرمپ نے کہا کہ باقی معاملے پر وہ کچھ نہیں کہہ سکتے، یہ زیادہ تراسرائیل پر منحصر ہوگا۔صدر ٹرمپ نے کہا کہ غزہ میں لوگوں کو کھانا کھلانے کی کوشش کر رہےہیں، اسرائیل خوراک کی تقسیم میں مدد کرےگا جبکہ عرب ممالک رقم سے مدد کریں گے۔واضح رہے کہ اسرائیلی وزیر اعظم نے منگل کو سینیئر سکیورٹی حکام سے ملاقات کی۔میڈیا رپورٹ کے مطابق نیتن یاہو نے غزہ پر مکمل فوجی قبضے کی حمایت کی ہے جبکہ ٹرمپ انتظامیہ کا غزہ میں امداد کا انتظام امریکا کے زیرانتظام لینے کا منصوبہ ہے۔اس سے قبل پیر کو اسرائیلی میڈیا نے رپورٹ کیا تھا کہ وزیراعظم نیتن یاہو غزہ میں فوجی کارروائیوں کو وسعت دینے پر غور کر رہے ہیں۔اسرائیلی میڈیا نے مزید بتایا کہ زیر غور منصوبوں میں ان علاقوں میں بھی فوجی کارروائیاں شامل ہیں جہاں یہ شبہ ہے کہ یرغمالی رکھے گئے ہیں۔