انٹرنیشنل ڈیسک(نیشنل ٹائمز) مائیکرو سوفٹ کے بانی بل گیٹس کی تنظیم ‘دی گیٹس فاؤنڈیشن’ نے عورتوں کی صحت کے لیے ڈھائی ارب ڈالرز مختص کرنے کا اعلان کردیا۔
خواتین کی صحت کے لیے مختص کی گئی یہ رقم سال 2030 تک خرچ کی جائے گی اور یہ رقم ان امراض پر ترجیحی بنیادوں پر خرچ ہوگی جو عموماً نظر انداز کردیے جاتے ہیں۔بل گیٹس نے ایک بیان میں بتایا کہ خواتین عموماً ان بیماریوں سے ہلاک ہوجاتی ہیں جن کا باآسانی علاج ممکن ہوتا ہے۔انہوں نے بتایا کہ نئی فنڈنگ دوران حمل ہونے والے بلڈ پریشر ، ہائی بلڈ شوگر لیول اور مینو پاز جیسی بیماریوں کے علاج اور ریسرچ پر خرچ ہوگی۔ان کا کہنا تھا کہ دوران حمل ہونے والی پیچیدگیوں سمیت ویکسینیشن، ماں کی صحت، غذا اور جنسی عمل سے منتقل ہونے والی بیماریوں پر بھی خصوصی توجہ دی جائے گی۔