بیجنگ(شِنہوا)چین میں سیلابی موسم کے آغاز سے اب تک ریکارڈ توڑ درجہ حرارت دیکھنے میں آیا ہے جہاں معمول سے پہلے آنےوالی اور طویل عرصے تک جاری رہنے والی گرمی کی لہریں محسوس کی گئی ہیں۔
قومی موسمیاتی مرکز کے نائب سربراہ جیا شیاؤلونگ نے بدھ کے روز ایک پریس کانفرنس کے دوران کہا کہ سیلابی موسم کے آغاز سے اب تک ملک بھر میں گرم دنوں کی اوسط تعداد 8.5 ہو گئی ہے جو کہ اس عرصے کے دوران اب تک کی بلند ترین سطح ہے۔ اوسط درجہ حرارت ریکارڈ پر دوسرا بلند ترین رہا۔
ملک بھر کے مجموعی 45 قومی موسمیاتی سٹیشنز نے یومیہ بنیاد پر ریکارڈ بلند درجہ حرارت نوٹ کیا جن میں شانشی کے شہر شن پھنگ میں درجہ حرارت 43.1 ڈگری سیلسیئس تک جا پہنچا۔
2جولائی کو قومی انسداد امراض و تدارک انتظامیہ اور چین کی موسمیاتی انتظامیہ نے مشترکہ طور پر تاریخ میں پہلی بار اعلیٰ درجہ حرارت سے متعلق صحت کے خطرات کی ایک وارننگ جاری کی۔
چین نے موسمیاتی تبدیلیوں سے مطابقت اختیار کرنے کو ترجیح دی ہے۔ خاص طور پر 2024 میں ملک نے ابتدائی وارننگ سسٹمز کے قیام کے لئے ایک قومی منصوبہ جاری کیا ہے۔