کراچی (نیشنل ٹائمز) پاکستان کے زرمبادلہ کے مجموعی ذخائر میں 17.33 کروڑ ڈالرز کا اضافہ ہوگیا ہے۔ میڈیا کے مطابق اسٹیٹ بینک آف پاکستان کے مطابق ملکی زرمبادلہ کے ذخائر میں 17.33 کروڑ ڈالرز کا اضافہ ہوگیا ہے۔ ملک کے زرمبادلہ کے ذخائر 9 اگست تک 14.64 ارب ڈالرز رہے۔ مرکزی بینک کے ذخائر 11.93 کروڑ ڈالر بڑھ کر 9.27 ارب ڈالرز رہے۔
کمرشل بینکوں کے ذخائر 5.4 کروڑ ڈالر اضافے سے 5.37 ارب ڈالرز رہے۔
دریں اثناں میڈیا کے مطابق وزیرخزانہ محمد اورنگزیب کی زیرصدارت اقتصادی رابطہ کمیٹی کا اجلاس ہوا۔ رواں مالی سال یوٹیلیٹی اسٹورز کیلئے وزیراعظم ریلیف پیکج جاری رکھنے کی منظوری دے دی گئی۔ مالی سال 2024-25 کیلئے 50 ارب کی ٹارگٹڈ سبسڈی کی منظوری دی گئی۔
بےنظیر انکم سپورٹ پروگرام کے بینیفشریز ریلیف پیکج سے مستفید ہوں گے، ریلیف پیکج کے تحت 5 بنیادی اشیاء پر سبسڈی دی جائے گی ۔
اقتصادی رابطہ کمیٹی نے ویئر ہاؤسنگ کو صنعت کا درجہ دینے کی منظوری دے دی ہے۔ اسی طرح ملک میں فی تولہ سونے کی قیمت میں بھی 300 روہے کی کمی ریکارڈ کی گئی۔ جس کے بعد سونے کی فی تولہ قیمت 2 لاکھ 57 ہزار 400 روپے ہوگئی ہے۔ دس گرام سونے کی قیمت 256 روپے کمی کے بعد 2 لاکھ 20 ہزار 680 روپے ہوگئی ہے۔ دوسری جانب صدر پاکستان مسلم لیگ ن میاں نوازشریف کی زیر صدارت اہم مشاورتی اجلاس ہوا۔
اجلاس میں عوام کو مہنگائی خاص طور پر بجلی کے مہنگے بلوں میں ریلیف دینے پر تفصیلی غور کیا گیا۔ پارٹی قائد نوازشریف نے کہا کہ یہ ہماری صلاحیتوں کا امتحان ہے کہ مشکل ترین حالات میں بھی عوام کو ریلیف کیسے دینا ہے، ملک کو ڈیفالٹ سے بچانے کی طرح اب عوام کو ڈیفالٹ سے بچانا بھی ہمارا بڑا امتحان ہے، وزیراعظم شہبازشریف نے پارٹی صدر کو قومی معاشی ایجنڈے کے خدو خال سے آگاہ کیا۔
