اسلام آباد (نیشنل ٹائمز) عالمی بینک اگلے 5سال کے دوران پاکستان کو 8ارب 70کروڑ ڈالرقرض دے گا،اقتصادی امور ڈویژن کے مطابق عالمی بینک کی جانب سے ملنے والے فنڈز مختلف ترقیاتی منصوبوں پر خرچ کے جائیں گے،اقتصادی امور ڈویژن نے بتایا کہ پاکستان میں عالمی بینک کے تعاون سے 58منصوبوں پر کام جاری ہے، جن کی مجموعی لاگت 14ارب 80کروڑ ڈالر ہے ، پاکستان کو اب تک 6ارب 16کروڑ ڈالر مل چکے ہیں،اقتصادی امور ڈویژن کا بتانا ہے کہ عالمی بینک 2029تک مزید 8ارب 70کروڑ ڈالر قرضہ فراہم کرے گا، ان میں داسو ہائیڈرو پاور پروجیکٹ فیز ون کے لیے ایک ارب ڈالر کی اضافی فنانسنگ شامل ہے جبکہ داسو ٹرانسمیشن لائن منصوبے کے لیے 70کروڑ ڈالر قرض ملے گا، داسو ہائیڈرو پاور اسٹیج ون پروجیکٹ کیلیے 58کروڑ 84لاکھ ڈالر ملیں گے،اقتصادی امور ڈویژن کے مطابق سندھ فلڈ ایمرجنسی بحالی منصوبے کے لیے 50کروڑ ڈالر اور سندھ میں ہائوسنگ کے منصوبے کے لیے بھی 50کروڑ ڈالر ملیں گے،اس کے علاوہ خیبر پاس اکنامک کوریڈور منصوبے کے لیے 46کروڑ ڈالر ، کے پی میں ہائیڈرو اور قابل تجدید توانائی منصوبے کیلئے 45کروڑ ڈالر ، خیبر پختوانخوا میں اخراجات اور ترقیاتی منصوبے کے لیے 40کروڑ ڈالر دیئے جائیں گے،اقتصادی امور ڈویژن کے مطابق عالمی بینک اعلی تعلیم کی ترقی کے منصوبے کے لیے 40کروڑ ڈالر، پنجاب کے دیہی علاقوں میں پانی کی فراہمی کیلئے 44کروڑ ڈالر ، تربیلا فور توسیعی منصوبے کے لیے 39کروڈ ڈالردے گا۔