اسلام آباد (نیشنل ٹائمز) وزارت خزانہ نے آئندہ ماہ مہنگائی میں کمی ہونے کی پیش گوئی کردی۔ تفصیلات کے مطابق وفاقی وزارت خزانہ کی جانب سے مہنگائی کی شرح میں کمی ہو جانے کا دعوٰی کرتے ہوئے امکان ظاہر کیا جا رہا ہے کہ رواں مالی سال کے دوسرے ماہ میں مہنگائی کی شرح مزید کم ہو جائے گی۔ وفاقی وزارت خزانہ کی جانب سے ماہانہ معاشی اپ ڈیٹ آوٹ لک رپورٹ جاری کی گئی ہے جس کے مطابق اگست 2024 میں مہنگائی کم ہوکر 11 سے12فیصد تک رہنے کا تخمینہ ہے، جبکہ جولائی میں ماہانہ مہنگائی کی شرح 12 سی13 فیصد تک رہنے کی توقع ہے۔
وزارت خزانہ کی جاری کردہ رپورٹ میں بتایا گیا کہ آئندہ مہینوں میں برآمدات اور درآمدات میں اضافے کی توقع ہے، جولائی میں برآمدات 2.4 سے 2.7 ارب ڈالرز تک رہنے کا امکان ہے۔

وزارت خزانہ نے بتایا کہ جولائی کے لیے درآمدات کا تخمینہ 4.5 سے 4.9 ارب ڈالرز تک ہے، اس کے علاوہ بڑی صنعتوں کی پیداوار میں اضافے کا سلسلہ جاری رہے گا۔ رپورٹ کے مطابق مستحکم ایکسچینج ریٹ، درآمدات پرنرمی سیبڑی صنعتوں کی پیداوار میں اضافہ متوقع ہے، جبکہ عالمی منڈی میں اشیا کی قیمتوں میں کمی بیرونی سیکٹرکے استحکام کے لیے اہم ہے۔

یہاں واضح رہے کہ رواں مالی سال کے بجٹ میں وفاقی حکومت کی جانب سے ٹیکسوں کی بھرمار کی گئی ہے، جس پر ہر طبقے سے وابستہ لوگ سراپا احتجاج ہیں۔ نئے مالی سال کے بجٹ میں بے شمار نئے ٹیکسز کے نفاز سے ملک میں مہنگائی کا ایک نیا طوفان آیا ہے، تاہم وزارت خزانہ کا دعوٰی ہے کہ ناصرف مہنگائی کم ہو گئی ہے، بلکہ آئندہ مہینوں میں مہنگائی مزید کم ہو جائے گی۔