اقوام متحدہ (شِنہوا) متحدہ عرب امارات (یو اے ای) کی سفارت کار لانا نسیبہ اقوام متحدہ کے آئندہ سیکرٹری جنرل کی دوڑ میں شامل ہو گئی ہیں۔
بدھ کے روز اقوام متحدہ کی ویب سائٹ پر سیکرٹری جنرل کے آئندہ انتخاب سے متعلق سرکاری صفحے پر ان کا نام شامل کیا گیا۔
ویب سائٹ کے مطابق لانا نسیبہ کو ان کے ملک متحدہ عرب امارات نے نامزد کیا ہے۔
لانا نسیبہ اس وقت متحدہ عرب امارات کی وزارت خارجہ میں وزیر مملکت کے عہدے پر فائز ہیں۔
متحدہ عرب امارات کے سرکاری خبر رساں ادارے امارات نیوز ایجنسی کے مطابق لانا نسیبہ نے اپنی نامزدگی پر توجہ مرکوز کرنے کے لئے عہدے سے رخصت لے لی ہے۔
لانا نسیبہ 2013 سے 2024 تک اقوام متحدہ میں متحدہ عرب امارات کی مستقل مندوب رہیں۔ اس عرصے میں متحدہ عرب امارات 2022 سے 2023 تک اقوام متحدہ کی سلامتی کونسل کا منتخب رکن بھی رہا۔ سلامتی کونسل میں متحدہ عرب امارات کی دو سالہ رکنیت کے دوران لانا نسیبہ نے دو مرتبہ باری باری کونسل کی صدارت کی ذمہ داریاں انجام دیں۔
1978 میں پیدا ہونے والی لانا نسیبہ اقوام متحدہ کے اعلیٰ ترین عہدے کے لئے سب سے کم عمر امیدوار ہیں۔
اس وقت اس عہدے کے لئے امیدواروں کی تعداد 7 ہوگئی ہے۔ سلامتی کونسل میں اب تک ہونے والی رائے شماری کے 6 غیر رسمی مراحل میں کوئی بھی امیدوار کونسل کی جانب سے نامزدگی کی سفارش کے لئے مطلوبہ حمایت حاصل نہیں کر سکا۔
اقوام متحدہ کے منشور کے تحت سلامتی کونسل سیکرٹری جنرل کی تقرری کے لئے جنرل اسمبلی کو ایک امیدوار کی سفارش کرتی ہے۔
اس وقت 7 امیدواروں میں ایکواڈور کی سابق وزیر اور سفارت کار ایوون اے باکی، اقوام متحدہ کی جنرل اسمبلی کی سابق صدر اور ایکواڈور کی سابق وزیر خارجہ و وزیر دفاع ماریا فرنانڈا ایسپینوسا، ارجنٹائن سے تعلق رکھنے والے بین الاقوامی جوہری توانائی ایجنسی کے موجودہ ڈائریکٹر جنرل رافیل گروسی، کوسٹا ریکا کی سابق نائب صدر اور اقوام متحدہ کی تجارت و ترقی کی کانفرنس کی موجودہ سیکرٹری جنرل ربیقا گرینسپان، یوگنڈا کے سابق انڈر سیکرٹری جنرل اولارا اوتونو، اقوام متحدہ میں گیانا کی مستقل نمائندہ کیرولین روڈریگویز برکٹ اور سینیگال کے سابق صدر میکی سال شامل ہیں۔
اقوام متحدہ کے نئے سیکرٹری جنرل کے عہدے کی مدت یکم جنوری 2027 سے شروع ہوگی۔