مسقط (شِنہوا) عمان میں پہلے چینی فلم ویک کا مسقط میں آغاز ہو گیا ہے جس میں مقامی شائقین کے لئے مختلف اصناف کی چینی فلمیں پیش کی جا رہی ہیں تاکہ چینی سینما اور ثقافت کے فنکارانہ حسن کو اجاگر کیا جا سکے۔
عمان میں چین کے سفیر لیو جیان نے اپنے خطاب میں کہا کہ یہ پہلا موقع ہے کہ عمان میں چینی فلم ویک کا انعقاد کیا جا رہا ہے۔ انہوں نے واضح کیا کہ منتخب کی گئی فلمیں چینی ثقافت کے تسلسل اور تنوع کو نمایاں کرنے کے ساتھ ساتھ دنیا بھر کے انسانوں میں پائے جانے والے مشترکہ جذبات و احساسات کی عکاسی کرتی ہیں۔
لیو نے مزید کہا کہ چین عمان کے ساتھ باہمی مفاد پر مبنی تعاون اور تبادلوں کو مضبوط بنانے اور دونوں ممالک کے عوام کے مفاد میں چین-عمان تزویراتی شراکت داری کو مشترکہ طور پر آگے بڑھانے کے لئے تیار ہے۔
عمان فلم سوسائٹی کے چیئرمین انور الرزیقی نے کہا کہ چینی سینما اپنے ملک کے مالامال ثقافتی ورثے میں گہرا رچا بسا ہے۔ انہوں نے اس اعتماد کا اظہار کیا کہ ان فلموں کی نمائش سے عمانی شائقین کو ایک منفرد تجربہ دیکھنے اور سننے کو ملے گا۔
’’سرحدوں سے آگے کہانیاں‘‘ کے عنوان سے منعقدہ یہ تقریب ہفتہ تک جاری رہے گی، اس کا اہتمام عمان میں چینی سفارت خانے، چائنہ فلم ایڈمنسٹریشن اور عمان فلم سوسائٹی کے باہمی اشتراک اور چائنہ فلم آرکائیو کے تعاون سے کیا گیا ہے۔
نمائش کے لئے منتخب کی گئی فلموں میں ’’اے ٹیپسٹری آف اے لیجنڈری لینڈ‘‘، ’’دی ونڈرنگ ارتھ 2‘‘، ’’آئی ایم وٹ آئی ایم 2‘‘ اور ’’ڈیئر یو‘‘ شامل ہیں، یہ فلمیں رقص، ڈرامہ، سائنس فکشن اور اینیمیشن جیسے موضوعات پر مبنی ہیں۔