لاہور(نیشنل ٹائمز)وزیراعلیٰ پنجاب مریم نواز شریف نے حوثی ملیشیا کا ریاض کے شاہ خالد ایئرپورٹ پر حملے کی شدید مذمت کی ہے ،انہوں نے شاہ خالد ایئرپورٹ پر حملے میں جاں بحق افراد کے لواحقین سے  دلی تعزیت کی اورکہاکہ زخمیوں کی جلد صحت یابی کے لیے دعا گو ہوں ،وزیراعلی ٰ نے کہاکہ حوثی حملے بین الاقوامی قوانین کی کھلی خلاف ورزی ہیں، ہم سعودی عرب کی خودمختاری، علاقائی سا لمیت اور سلامتی کے لیے غیر متزلزل عزم کا اعادہ کرتے ہیں، اہل پاکستان سعودی عرب کی سلامتی کے لیے ہر قدم پر ساتھ ہیں۔ دریں اثنا بیٹیوں کے عالمی دن پر اپنے پیغام میں وزیراعلیٰ پنجاب نے کہاہے کہ بیٹیاں اللہ تعالیٰ کی رحمت اور معاشرے کا قیمتی سرمایہ ہیں۔وزیراعلیٰ نے کہاکہ بیٹیوں کو تعلیم، صحت، تحفظ اور ترقی کے یکساں مواقع فراہم کرنا ہم سب کی مشترکہ ذمہ داری ہے ، بیٹیوں کو بااختیار بنا کر ہی ایک مضبوط، خوشحال اور ترقی یافتہ معاشرے کی بنیاد رکھی جا سکتی ہے ، بچیوں کے حقوق کے تحفظ، تعلیم کے فروغ اور انہیں خودمختار بنانے کے لیے اقدامات کی اہمیت کو اجاگر کرنے پر زور دیا جارہاہے۔

انہوں نے کہاکہ ہر بیٹی کو ایسا محفوظ اور سازگار ماحول ملنا چاہیے جہاں وہ اپنے خواب پورے کر سکے اور ملک و قوم کی ترقی میں اپنا کردار ادا کرے ، بیٹیوں کا حوصلہ، عزم اور صلاحیتیں دنیا کو بدلنے کی طاقت رکھتی ہیں، وہ آگے بڑھیں، حکومت ان کے ساتھ کھڑی ہے ،ہماری بیٹیاں، بہنیں اور بچیاں قوم کا مستقبل ہیں، بیٹیوں کی پرورش اور دیکھ بھال نہ صرف ان کا حق ہے بلکہ یہ ایک قومی فریضہ بھی ہے ،بیٹیوں کو تعلیم کے مساوی مواقع فراہم کرنا اور ان کے روشن مستقبل کو یقینی بنانا ہماری ترجیحات میں شامل ہے ، علاوہ ازیں انہوں نے ضلع کرم میں سرحدی دراندازی ناکام بنانے اور 12 دہشتگرد ہلاک کرنے پر سکیورٹی فورسز کو خراج تحسین پیش کیاہے ،وزیراعلیٰ نے دہشتگردوں کے خلاف کارروائی کے دوران شہید نائب صوبیدار ہدایت امان کو خراج عقیدت پیش کیاہے اورشہید کے اہل خانہ سے اظہارِ تعزیت کیا۔ مزید برآں وزیراعلیٰ پنجاب نے پنڈی گھیب میں سلنڈر دھماکا میں 4 افراد کے جاں بحق ہونے پرگہرے دکھ اور افسو س کااظہار کیاہے۔