جکارتہ( شِنہوا)انڈونیشیا کی قومی لائبریری نے ایک تقریب کے دوران 11 چینی اشاعتی اداروں سے 100 کتابوں کا عطیہ وصول کیا۔
لائبریری نے ایک پریس ریلیز میں کہا کہ کتابوں میں “شی جن پھنگ کی قیادت میں چین کا نطم ونسق”کی پہلی جلد کا انگریزی ایڈیشن بھی شامل ہے۔ کتابوں کو قومی لائبریری نے اپنے مجموعے کی ترقی کے اصولوں کے مطابق انتخاب اور جانچ کے عمل سے گزارا ہے، جبکہ لائبریری نے مزید کہا کہ اس عمل میں صارفین کی ضروریات، رسائی، مطابقت، موضوعات کے تنوع اور حوالہ جاتی ذرائع کے طور پر موزوں ہو نے کو بھی مدنظر رکھا گیا۔
انڈونیشیا میں چینی سفارتخانے کے ثقافتی قونصلر وانگ سی پھنگ نے تقریب میں کہا کہ عطیہ کی گئی کتابیں چینی ثقافت، تاریخ، ادب، سائنس و ٹیکنالوجی اور زبان سیکھنے سمیت وسیع شعبوں کا احاطہ کرتی ہیں، جو چین کے اشاعتی شعبے کی جانب سے احتیاط سے منتخب کیا گیا ثقافتی تحفہ ہیں۔
وانگ نے کہا کہ ان کتابوں کے انڈونیشیا کی قومی لائبریری کا حصہ بننے کے بعد یہ انڈونیشیائی قارئین کے لیے چین کے بارے میں جاننے کے لیے ایک نئی کھڑکی کھولیں گی، جبکہ دونوں ممالک کی علمی اور تعلیمی برادریوں کے درمیان تبادلوں کے لیے نئے وسائل بھی فراہم کریں گی۔
دوسری جانب انڈونیشیا کی قومی لائبریری کے ڈائریکٹر ای امین الدین عزیز نے اس بات پر زور دیا کہ اس مجموعے کو محض لائبریری کے ذخیرے میں اضافے کے طور پر نہیں دیکھا جانا چاہیے بلکہ اسے عوام کی علم تک رسائی کو وسیع کرنے کی ایک کوشش بھی سمجھنا چاہیے۔