لاہور (نیشنل ٹائمز) وفاقی وزیر داخلہ محسن نقوی نے خبردار کیا ہے کہ وفاقی دارالحکومت پر دھاوا بولنے کی تیاری کی جا رہی ہے، تاہم اس بار اسلام آباد کو کئی روز تک بند نہیں ہونے دیا جائے گا اور قانون کے مطابق کارروائی کی جائے گی۔
لاہور میں پریس کانفرنس کرتے ہوئے محسن نقوی نے کہا کہ خیبر پختونخوا پولیس کے حالات سب کے سامنے ہیں، ہمارے جوان شہید ہو رہے ہیں۔ ان کا کہنا تھا کہ شہید ہونے والے جوان صرف ہمارے یا ان کے نہیں بلکہ پاکستان کے شہید ہیں۔
وفاقی وزیر داخلہ نے سیاسی اختلافات کا حوالہ دیتے ہوئے کہا کہ کوئی وزیر شہیدوں کے جنازوں میں شریک نہیں ہوا۔ انہوں نے کہا کہ آپ اتنے بے حس ہوگئے ہیں کہ نہ خود اور نہ ہی کوئی وزیر شہیدوں کے جنازے میں گیا۔
محسن نقوی کے مطابق پی ٹی آئی کے بیشتر لوگ لانگ مارچ نہیں کرنا چاہتے اور انہیں خود بھی معلوم نہیں کہ ان کا مطالبہ کیا ہے۔ انہوں نے کہا کہ عمران خان کا علاج قانون کے مطابق ہوگا، ان کی مرضی کے مطابق نہیں، جبکہ گزشتہ روز بھی عمران خان کا میڈیکل چیک اپ کیا گیا۔
وزیر داخلہ نے کہا کہ اسلام آباد پر دھاوا بولنے کی تیاری کی جا رہی ہے اور وفاقی دارالحکومت کو بند کرنے کی کوشش کرنے والوں سے قانون کے مطابق سختی سے نمٹا جائے گا۔ ان کے مطابق اسلام آباد ہائیکورٹ کا حکم موجود ہے اور اس پر من و عن عمل درآمد کرایا جائے گا۔
ان کا کہنا تھا کہ اب بھی وقت ہے کہ بند گلی میں جانے سے گریز کیا جائے اور ایسی صورتحال پیدا نہ کی جائے جہاں واپسی کا راستہ باقی نہ رہے۔ محسن نقوی نے کہا کہ حکومت کے پاس جو بھی قانونی راستہ ہوگا، وہ اختیار کیا جائے گا۔
انہوں نے کہا کہ اس بار ایسا نہیں ہوگا کہ کوئی آئے اور ملک 10 یا 20 دن کے لیے بند ہوجائے، بلکہ مستقل لائحہ عمل بنایا جائے گا اور وفاقی حکومت اس معاملے میں بھرپور کردار ادا کرے گی۔
اسلام آباد کو سومنات بنانے کی دھمکی سے متعلق سوال پر محسن نقوی نے کہا کہ جو لوگ بھڑکیں مارتے ہیں، انہیں مارنے دیں، اس سے کوئی فرق نہیں پڑتا۔
ملک میں پیٹرولیم مصنوعات کی قیمتوں میں اضافے سے متعلق سوال پر وفاقی وزیر داخلہ نے کہا کہ وہ معیشت کے معاملے پر زیادہ بات نہیں کرنا چاہتے۔ ان کے مطابق عالمی مارکیٹ کے حساب سے پیٹرول کی قیمت میں اضافہ ہوتا ہے جبکہ کئی ممالک میں پیٹرول دستیاب ہی نہیں۔
محسن نقوی نے کہا کہ موجودہ صورتحال میں وفاقی وزیر نے درست کہا کہ ایک ہزار روپے میں بھی پیٹرول نہیں ملے گا۔ ان کا کہنا تھا کہ ایک ایک جہاز کے پیچھے ہر شخص جان مار رہا ہے۔
نئے صوبوں کے قیام سے متعلق سوال پر محسن نقوی نے کہا کہ وہ پُرامید ہیں کہ ملک میں نئے صوبے ضرور بنیں گے۔ ان کے مطابق نئے صوبوں کا معاملہ بڑی تیزی سے آگے بڑھ رہا ہے۔