اسلام آباد (نیشنل ٹائمز) نائب وزیراعظم اور وزیر خارجہ سینیٹر محمد اسحاق ڈار نے ترک وزیر خارجہ خاقان فیدان سے ٹیلی فون پر گفتگو کی۔
دفتر خارجہ کے مطابق دونوں رہنمائوں نے خطے کی حالیہ صورتحال پر تبادلہ خیال کیا اور علاقائی امن و استحکام کے فروغ کے لئے کوششوں پر بات چیت کی ، ترک وزیر خارجہ نے نائب وزیراعظم اور وزیر خارجہ کو پاکستان، ترکیہ، سعودی عرب اور مصر کے وزرائے خارجہ کے آئندہ اجلاس میں شرکت کی دعوت دی جو رواں ماہ کے آخر میں استنبول میں منعقد ہوگا۔ نائب وزیراعظم نے دعوت قبول کرتے ہوئے اجلاس میں اپنی شرکت کی تصدیق کی۔دریں اثنا نائب وزیراعظم نے پاکستان میں اقوام متحدہ کے ریذیڈنٹ کوآرڈی نیٹر محمد یحیی سے الوداعی ملاقات کی۔ اس موقع پر اسحاق ڈار نے پاکستان اور اقوام متحدہ کے درمیان تعاون کے فروغ کے لئے محمد یحیی کی خدمات کو سراہا اور ان کی قیادت میں اقوام متحدہ کی کنٹری ٹیم کی کاوشوں کا اعتراف کیا۔نائب وزیراعظم نے محمد یحیی کو اقوام متحدہ کے دفتر برائے رابطہ انسانی امور میں اسسٹنٹ سیکرٹری جنرل برائے انسانی امور اور ڈپٹی ایمرجنسی ریلیف کوآرڈی نیٹر مقرر ہونے پر مبارکباد دی۔
محمد یحیی نے پاکستان میں اپنی تعیناتی کے دوران تعاون اور حمایت پر نائب وزیراعظم اور وزارت خارجہ کا شکریہ ادا کیا ، انہوں نے اپنے نئے منصب پر بھی پاکستان کے ساتھ قریبی تعاون جاری رکھنے کی خواہش کا اظہار کیا۔ مزید برآں اسحاق ڈار کا موریطانیہ کے وزیر خارجہ سے ٹیلی فونک رابطہ کیا ، ملاقات میں دوطرفہ تعلقات پر تبادلہ خیال کیا ،ترجمان دفتر خارجہ کے مطابق دونوں رہنماؤں نے باہمی دلچسپی کے دوطرفہ اور کثیرالجہتی امور پر تبادلہ خیال کیا ،اس موقع پر اسحاق ڈار نے پاکستان اور موریطانیہ کے درمیان مضبوط اور دیرینہ تعلقات کا اعادہ کیا ،دونوں رہنماؤں نے دوطرفہ روابط کو مزید مستحکم بنانے اور باہمی دلچسپی کے مختلف شعبوں میں تعاون بڑھانے کے عزم کا اظہار کیا۔
