اسلام آباد(نیشنل ٹائمز)وفاقی کابینہ نے ڈیفنس فورسز ایکٹ 2026ء اور نیشنل کمانڈ اتھارٹی ایکٹ 2010ء میں ترمیم کی منظوری دے دی۔

وزیراعظم محمد شہباز شریف کی زیر صدارت وفاقی کابینہ کا اجلاس ہوا، جس میں دفاعی افواج ایکٹ 2026ء کے مسودے کی منظوری دی گئی، اب یہ مسودہ پارلیمان کے جاری اجلاس میں منظوری کے لئے پیش کیا جائے گا۔

ڈیفنس فورسز ایکٹ کا مسودہ 27 ویں آئینی ترمیم کے ذریعے کی گئی ترامیم کے تسلسل میں تیار کیا گیا ہے اور اسکا مقصد چیف آف ڈیفنس فورسز کے عہدے اور چیف آف ڈیفنس فورسز ہیڈ کوارٹرز کے حوالے سے متعلقہ انتظامی امور کا تعین کرنا ہے۔

وفاقی کابینہ نے نیشنل کمانڈ اتھارٹی ایکٹ 2010ء میں ترمیم کی بھی منظوری دی جو 27 ویں آئینی ترمیم کے بعد ایک ضروری عمل تھا،نیشنل کمانڈ ایکٹ 2010ء میں ترمیم شدہ مسودہ بھی منظوری کیلئے پارلیمان میں پیش کیا جائے گا۔

ذرائع کے مطابق وفاقی کابینہ اجلاس میں امن و امان اور سیاسی صورتحال پر غور کیا گیا، ممکنہ قانون سازی کے معاملے پر بھی گفتگو ہوئی۔

اجلاس میں بانی پی ٹی آئی عمران خان کے حوالے سے سپریم کورٹ کے فیصلے اور حکومتی اپیل کا بھی جائزہ لیا گیا، وزیر قانون نے کابینہ کو حکومتی اپیل کے حوالے سے بریفنگ دی۔