مظفر آباد(نیشنل ٹائمز) آزاد کشمیر الیکشن کے تیسرے مرحلے میں باغ کے دو حلقوں کے 23 پولنگ سٹیشنوں پر ری پولنگ شروع ہو گئی ہے۔

آزاد کشمیر کے ضلع باغ کے ایل اے 15کے 9 اور ایل اے 16 کے 14 پولنگ سٹیشن شامل ہیں جہاں ری پولنگ ہو رہی ہے۔

ایل اے 16 کے باغ 3 کے14 پولنگ سٹیشنز پر ووٹرز کی تعداد 7004 ہے، ایل اے 15 باغ 2 کے 9 پولنگ سٹیشنوں پر ووٹرز کی تعداد 5 ہزار ہے۔

الیکشن کمیشن کے مطابق ری پولنگ کے دوران سیکورٹی کے سخت انتظامات کیے گئے ہیں، ووٹ ڈالنے کا عمل صبح 8 بجے سے شام 5 بجے تک جاری رہے گا۔

خیال رہے کہ دونوں حلقوں میں 10 اگست کو عملہ نہ پہنچنے اور کشیدگی کے باعث پولنگ ملتوی کی گئی تھی۔

ادھر الیکشن کمیشن نے آزاد جموں و کشمیر قانون ساز اسمبلی کے حلقہ ایل اے 14 اور ایل اے 17 سے کامیاب امیدواران کا نوٹیفکیشن جاری کر دیا۔

ایل اے 14 غربی باغ سے جموں و کشمیر عوامی دست و بازو کے ساجد اقبال کامیاب قرار پائے جبکہ حلقہ ایل اے 17 حویلی سے پی پی کے فیصل ممتاز راٹھور کی کامیابی کا نوٹیفکیشن جاری کیا گیا۔