استنبول(نیشنل ٹائمز) ترک حکام نے شبہ ظاہر کیا ہے کہ اسرائیل نے انقرہ میں ٹرمپ کے طیارے پر حملے کی سازش کی جعلی رپورٹ تیار کی ہے۔
غیر ملکی خبر ایجنسی کے مطابق ترک حکام کو شک ہے کہ اسرائیل نے ٹرمپ کے طیارے پر قاتلانہ حملے کی سازش کی جعلی رپورٹ تیار کی تاکہ امریکا اور ایران کے درمیان معاہدے کو سبوتاژ کیا جا سکے۔
رپورٹ کے مطابق ترک حکام کا خیال ہے کہ گزشتہ ماہ انقرہ میں ہونے والی نیٹو سربراہی کانفرنس کے دوران امریکی صدر ڈونلڈ ٹرمپ کو قتل کرنے کیلئے ایران کی مبینہ سازش سے متعلق اسرائیلی خفیہ اطلاعات شاید من گھڑت تھیں اور ان کا مقصد ایران کے ساتھ امریکی مذاکرات کو سبوتاژ کرنا ہوسکتا ہے۔
اسرائیلی رپورٹ ایسے وقت میں سامنے آئی جب ٹرمپ ایران کے ساتھ ایک معاہدے کی کوشش کر رہے تھے، جس کا مقصد حالیہ جنگ ختم کرنا اور آبنائے ہرمز کو دوبارہ کھولنا تھا۔
ترک حکام کو شبہ ہے کہ اسرائیلی رپورٹ کا مقصد نیتن یاہو کی حکومت کو ٹرمپ کے محافظ کے طور پر پیش کرنا، ایران کے ساتھ مذاکرات کو ناکام بنانا اور امریکی صدر کے اردوان کے ساتھ بڑھتے ہوئے دوستانہ تعلقات کو نقصان پہنچانا ہوسکتا ہے۔
معاملے سے واقف ایک ترک اعلیٰ اہلکار کا کہنا ہے کہ ہمارے لیے یہ بالکل واضح تھا کہ اس رپورٹ کے درست ہونے کا کوئی امکان نہیں، اس طرح کی کوشش ترکیہ کو ایران کے ساتھ براہ راست محاذ آرائی کی طرف بھی دھکیل سکتی تھی۔
