اسلام آباد(نیشنل ٹائمز) نائب وزیراعظم و وزیر خارجہ اسحاق ڈار کو کویت کے وزیر خارجہ کی جانب سے ٹیلی فون کال موصول ہوئی، جس میں خطے کی تازہ ترین صورتحال اور باہمی دلچسپی کے امور پر تبادلہ خیال کیا گیا۔
ترجمان کے مطابق کویتی وزیر خارجہ نے ایران پر جاری حملوں پر شدید تشویش کا اظہار کرتے ہوئے امید ظاہر کی کہ تمام فریق تحمل کا مظاہرہ کریں گے۔
گفتگو کے دوران دونوں وزرائے خارجہ نے اسلام آباد مفاہمتی یادداشت (ایم او یو) پر مکمل عمل درآمد یقینی بنانے کے عزم کا اعادہ کیا۔
ترجمان کے مطابق کویتی وزیر خارجہ نے خطے میں مذاکرات کے فروغ اور استحکام کے لیے پاکستان کے کردار کو سراہا، جبکہ اسحاق ڈار نے فوری طور پر کشیدگی میں کمی کی ضرورت پر زور دیا۔
دونوں رہنماؤں نے باہمی دلچسپی کے امور پر قریبی رابطے میں رہنے پر بھی اتفاق کیا۔
