صنعاء (نیشنل ٹائمز)یمن کے ساحل کے قریب بحیرہ احمر میں ایک مال بردار جہاز نامعلوم مسلح افراد کے حملے کی زد میں آ گیا، جبکہ واقعے کے بعد تحقیقات کا آغاز کر دیا گیا ہے۔

برطانیہ کے میری ٹائم تجارتی آپریشنز (یو کے ایم ٹی او) نے واقعے کی تصدیق کرتے ہوئے بتایا کہ حملے کے دوران جہاز سے ہنگامی امدادی سگنل (ڈسٹریس الرٹ) موصول ہوا، جس کے بعد متعلقہ حکام کو فوری طور پر آگاہ کر دیا گیا۔

یو کے ایم ٹی او کے مطابق حملہ بحیرہ احمر میں یمن کی بندرگاہ الحدیدہ سے تقریباً 56 کلومیٹر (30 بحری میل) جنوب مغرب میں پیش آیا، جہاں نامعلوم مسلح افراد نے مال بردار جہاز کو نشانہ بنایا۔

ادارے نے بحیرہ احمر سے گزرنے والے تمام تجارتی جہازوں کو غیر معمولی احتیاط برتنے کی ہدایت کرتے ہوئے کہا ہے کہ علاقے میں کسی بھی مشتبہ سرگرمی کی فوری اطلاع متعلقہ حکام کو دی جائے۔

تاحال کسی گروپ نے حملے کی ذمہ داری قبول نہیں کی، جبکہ حملے کی نوعیت، جہاز کو پہنچنے والے ممکنہ نقصان اور عملے کی صورتحال سے متعلق مزید تفصیلات سامنے نہیں آئی ہیں۔ متعلقہ حکام واقعے کی تحقیقات کر رہے ہیں۔