اسلام آباد (شِنہوا) پاکستان نے گوادر بندرگاہ پر علاقائی و عالمی ٹرانزٹ اور جہاز رانی کی سرگرمیوں کو فروغ دینے کے لئے محصولات میں بڑے پیمانے پر کمی کا اعلان کیا ہے۔
وزارت بحری امور کے بیان کے مطابق کنٹینر بردار بحری جہازوں اور ٹرانزٹ یا ٹرانس شپمنٹ کارگو لے جانے والے جہازوں کے لئے برتھنگ فیس میں 25 فیصد کمی کر دی گئی ہے، جبکہ بین الاقوامی ٹرانس شپمنٹ کنٹینر کارگو پر پورٹ چارجز میں 40 فیصد کمی کی گئی ہے۔
اسی طرح نظرثانی شدہ ٹیرف ڈھانچے کے تحت ٹرانزٹ کنٹینر کارگو پر عائد چارجز میں بھی 31 فیصد کمی کر دی گئی ہے، جس کا فوری طور پر اطلاق ہو گیا ہے۔
وزارت نے مزید بتایا کہ عام مال برداری کے لئے ایک ماہ کی مفت سٹوریج کی سہولت بھی متعارف کرائی گئی ہے جبکہ ملک کی دیگر قومی بندرگاہوں پر یہ سہولت عموماً صرف پانچ دن تک ہوتی ہے۔
بیان میں وزیر بحری امور جنید انوار چوہدری کے حوالے سے کہا گیا کہ اس اقدام کا مقصد گوادر بندرگاہ کی مسابقت کو بڑھانا اور اس گہرے سمندری بندرگاہ کے ذریعے علاقائی اور بین الاقوامی جہاز رانی میں اضافہ کرنا ہے۔
وزارت کے مطابق گوادر بندرگاہ کم انتظامی اخراجات، کم رش والے گہرے سمندری ماحول اور افغانستان، وسطی ایشیا اور مشرق وسطیٰ تک تزویراتی رابطے کی سہولت فراہم کرتی ہے۔