لاہور (ڈویلپمنٹ سیل) کلین لاہور کمپنی (WMC) نے اقبال ٹاؤن کے مختلف بلاکس میں گزشتہ 6 ماہ کے جرمانے سمیت فی گھر 7569 روپے کے کوڑا ٹیکس بلز تقسیم کر دیے ہیں۔ بلوں میں 11 مئی تک ادائیگی نہ کرنے کی صورت میں بھاری جرمانے اور ایف آئی آر کے اندراج کی تنبیہ بھی کی گئی ہے، جس پر رہائشیوں میں شدید غصہ پایا جا رہا ہے۔
عوامی کمیٹی اقبال ٹاؤن نے اس ٹیکس کو “جگا ٹیکس” قرار دے کر مسترد کر دیا۔ چیئرمین فاروق احمد اور صدر بابر شاہ کا کہنا ہے کہ پہلی بار اس انداز میں بل گھروں میں پھینکے گئے ہیں، جبکہ دسمبر 2025 سے اپریل تک اضافی سرچارج بھی شامل کیا گیا ہے۔
انہوں نے مؤقف اختیار کیا کہ صفائی کا نظام غیر تسلی بخش ہے اور عملہ ہفتے میں صرف تین دن کوڑا اٹھانے آتا ہے۔ عوامی کمیٹی کے مطابق مہنگائی سے پریشان شہریوں پر مزید بوجھ ڈالنا ناانصافی ہے۔
کمیٹی نے حکومت سے مطالبہ کیا ہے کہ موجودہ کوڑا ٹیکس واپس لیا جائے اور جولائی 2026 سے مناسب شرح مقرر کی جائے۔ بصورت دیگر رہائشی سڑکوں پر احتجاج کرنے پر مجبور ہوں گے۔