راولپنڈی (نیشنل ٹائمز) سکیورٹی فورسز نے خیبر پختونخوا میں پاک افغان سرحد پر دراندازی کی دو کوششیں ناکام بنا دیں۔

آئی ایس پی آر کے مطابق بھارتی سرپرستی یافتہ فتنہ خوارج سے تعلق رکھنے والے 13 خوارج کو ہلاک کر دیا گیا۔

آئی ایس پی آر کے مطابق سکیورٹی فورسز نے ضلع مہمند میں سرحد پر دراندازی کی کوشش کرنے والے خوارج کے گروہ کی نقل و حرکت کا سراغ لگایا اور مؤثر کارروائی کرتے ہوئے 8 دہشت گردوں کو ہلاک کر دیا۔

اسی طرح شمالی وزیرستان میں بھی پاک افغان سرحد پر دراندازی کی کوشش ناکام بنائی گئی، جہاں شدید فائرنگ کے تبادلے میں 5 خوارج مارے گئے۔

آئی ایس پی آر کا کہنا ہے کہ افغان حکومت اپنے شہریوں کو پاکستان میں دہشت گردی کے لیے استعمال ہونے سے روکے۔

بیان میں مزید کہا گیا کہ پاکستان کی سکیورٹی فورسز سرحدوں کے دفاع کے لیے پرعزم ہیں، جبکہ علاقے میں باقی خوارج کے خاتمے کے لیے کلیئرنس آپریشنز جاری ہیں۔ عزمِ استحکام کے تحت دہشت گردی کے خلاف کارروائیاں جاری رہیں گی اور بیرونی سرپرستی میں ہونے والی دہشت گردی کا مکمل خاتمہ کیا جائے گا۔